Një 31-vjeçar nga Kukësi është arrestuar pas një operacioni të koordinuar nga policia shqiptare në kuadër të fazës së “Operacionalja”, e fokusuar në kapjen e personave të kërkuar ndërkombëtarisht.
Arrestimi i tij ka ndodhur pas shpalljes në kërkim ndërkombëtar nga autoritetet kosovare. D. D., banues në Kukës, kërkohej nga Kosova për aktivitete kriminale në fushën e narkotikëve, konkretisht për trafikimin e kokainës.
Shtetasi Denis Dina është arrestuar nga Drejtoria e Forcës së Posaçme Operacionale, pasi në tetor të vitit 2024 ka transportuar rreth 1.1 kg kokainë nga Shqipëria në Kosovë me automjetin e tij.
Lënda narkotike është dorëzuar në Prishtinë nga Dina te shtetasi A.F, i cili gjatë një operacioni të përbashkët mes Policisë Shqiptare dhe asaj Kosovare e ka hedhur kokainën nga dritarja e automjetit para se të arrestohej.
Njoftimi i policisë:
Finalizohet një tjetër fazë e operacionit policor të koduar “Operacionalja”, për kapjen e personave në kërkim ndërkombëtar.
Operacioni nga Drejtoria e Forcës së Posaçme Operacionale në Departamentin e Policisë Kriminale.
Kapet në Kukës një 31-vjeçar i shpallur në kërkim ndërkombëtar nga Kosova, për veprimtari kriminale në fushën e narkotikëve.
Në vijim të operacioneve të njëpasnjëshme të zhvilluara nga Drejtoria e Forcës së Posaçme Operacionale, paraditen e sotme është finalizuar një tjetër fazë e operacionit policor të koduar “Operacionalja”, konkretisht:
Operacionalja 41, në kuadër të të cilit, nga ana e Drejtorisë së Forcës së Posaçme Operacionale, u bë e mundur lokalizimi në qytetin e Kukësit, kapja dhe ndalimi me qëllim ekstradimi i shtetasit D. D., 31 vjeç, banues në Kukës.
Ky shtetas rezulton i shpallur në kërkim ndërkombëtar pasi Gjykata e Prishtinës/Kosovë, më datë 14.04.2025, i ka caktuar masën e sigurimit “Arrest me burg” për veprën penale “Shkelje e ligjit për lëndët narkotike (kokainë)”, të parashikuar nga Kodi Penal i Kosovës. Operacioni vijon për kapjen e personave të tjerë të shpallur në kërkim ndërkombëtar dhe kombëtar.
