Policia Kufitare e Durrësit ka arrestuar Antonio Goffredo, një shtetas italian 51-vjeçar, i shpallur në kërkim ndërkombëtar nga Interpol Caracas.
Ai u kap gjatë një kontrolli rutinë në Portin e Durrësit, kur ishte në tentativë për të dalë nga Shqipëria.
Goffredo ishte shpallur në kërkim që prej vitit 2017, pas një vendimi të Gjykatës së Caracas, e cila kishte vendosur masën e sigurisë “Arrest në burg” për akuzën e mashtrimit.
Interpol Tirana po bashkëpunon me autoritetet e Interpol Caracas për realizimin e ekstradimit të tij në Venezuelë.
Njoftim:
Port, Durrës
Kapet nga Policia Kufitare dhe arrestohet me qëllim ekstradimin në Venezuelë, një 51-vjeçar i shpallur në kërkim ndërkombëtar.
Shërbimet e Policisë Kufitare në Portin e Durrësit, bazuar në informacionet e siguruara nga inteligjenca policore se një shtetas në kërkim ndërkombëtar do të udhëtonte drejt Italisë, kanë intensifikuar kontrollet për kapjen e tij.
Si rezultat, u kap në tentativë për të dalë nga Shqipëria dhe u arrestua me qëllim ekstradimin, shtetasi italian A. G., 51 vjeç, banues në Itali.
Ky shtetas ishte shpallur në kërkim ndërkombëtar nga Interpol Caracas, pasi Gjykata e Caracas, në vitin 2017, i ka caktuar masën e sigurisë “Arrest në burg”, për veprën penale “Mashtrimi”, parashikuar nga Kodi Penal i Venezuelës.
Interpol Tirana vijon bashkëpunimin me Interpol Caracas, për ta ekstraduar këtë shtetas, në Venezuelë.
