Përcillet për në banesën e fundit trupi i pajetë i ish-kryeministrit Bashkim Fino. Fino u nda nga jeta gjatë natës së kaluar, në moshën 59-vjeçare, pas betejës një mujore me koronavirusin.
Homazhet të cilat janë mbajtur në Pallatin e Kongreseve kanë zgjatur gjatë gjithë ditës së sotme.
Qeveria e ka shpallur datën 29 mars si ditë zie kombëtare të gjitha partitë politike kanë anuluar aktivitetet e tyre elektorale.
Kujtojmë se Bashkim Fino ka qenë Kryeministër i Shqipërisë prej 9 mars 1997 deri më 29 qershor 1997. Kreu studimet e larta në Universitetin e Tiranës, Fakulteti Ekonomik, dega Financë. Në vitin 1992, Z. Fino u zgjodh Kryetar i Bashkisë Gjirokastër, post të cilin e mbajti deri në vitin 1996.
Karriera e tij politike në Partinë Socialiste është e hershme. Prej vitit 1997 e në vazhdim ishte anëtar i Kryesisë së Partisë Socialiste. Kulmi i karrierës së tij do të shënohej në vitin 1997, ku do të zgjidhej Kryeministër i vendit në qeverinë e Pajtimit Kombëtar, post që do ta mbante nga muaji mars deri në korrik. Z. Fino ka mbajtur disa poste ministrore.
Nga viti 1997 deri në 1998 ushtroi detyrën e Ministrit të Pushtetit Lokal, njëkohësisht dhe Zv/kryeministër. Në 1999 deri në vitin 2001 do të ishte ministër i pushtetit lokal. Gjatë viteve 2001-2002 ka qenë Ministër i Punëve Publike dhe Turizmit.
