Në Firence është hapur zyrtarisht shkolla shqipe për fëmijët e komunitetit shqiptar, falë nismës së shoqatës kulturore “Adriatiku”, e cila vepron në të gjithë rajonin e Toskanës.
Kjo shkollë ofron mësim falas të gjuhës shqipe për fëmijët e moshës 5-15 vjeç dhe ka për qëllim të ruajë gjuhën, kulturën dhe identitetin kombëtar të brezit të ri të lindur në Itali.
Në ditën e parë të hapjes, që u zhvillua pranë ambienteve të Circolo SMS Rifredi, morën pjesë 25 fëmijë dhe shumë përfaqësues të komunitetit shqiptar në Firence.
Të pranishëm ishin edhe autoritete vendore italiane, përfshirë znj. Letizia Perini nga Bashkia e Firences, z. Bernardo Marasco i CGIL, si dhe drejtuesit e Distriktit 5, z. Filippo Ferraro e z. Franco Muzzi.
Presidenti i shoqatës “Adriatiku”, Naim Doda, përshëndeti të pranishmit dhe theksoi rëndësinë e kësaj nisme për ruajtjen e gjuhës amtare në një qytet me tradita të pasura kulturore si Firence.
Ndërsa Ardita Repishti, koordinatore e shkollës “Jeronim de Rada”, paraqiti planin e zhvillimit të saj, duke përmendur përkushtimin e mësueseve me eksperiencë në Itali dhe Shqipëri: Tonine Maçaj, Dafina Shima, Saimire Kopshti, Filloreta Alltari, Dafina Nine dhe Etleva Gjinaj.
Përfaqësuesit e institucioneve italiane vlerësuan përfshirjen e komunitetit shqiptar dhe shprehën mbështetjen e tyre për zgjerimin e shkollës shqipe në distrikte të tjera të qytetit.
Mesazhet e tyre u fokusuan në nevojën për bashkëpunim institucional dhe përfshirje aktive të shqiptarëve në jetën sociale dhe arsimore të Firences.
Shoqata “Adriatiku”, e përbërë nga anëtarë të Shqipërisë, Kosovës, Maqedonisë së Veriut, Malit të Zi dhe komunitetit arbëresh, synon të shndërrojë shkollën shqipe në një qendër kulturore ku do të organizohen edhe aktivitete të tjera si seminare, festa tradicionale dhe veprimtari që nxisin integrimin dhe njohjen e ndërsjellë mes komuniteteve në Itali.
Sfida sapo ka nisur, por mbështetja e komunitetit dhe institucioneve e bën rrugëtimin premtues.
