Ish- ministri i Drejtësisë Ylli Manjani, duke iu referuar komenteve të ndryshme që pasuan zgjedhjet dhe me ironi thotë që opozitës duhet ti vijë turp për denoncimet që bënë. Me anë të një statusi në rrjetet sociale ai shkruan se të kenë turp ata që kapën në flagrancë blerës të kartave para votimit dhe denoncimi që i bënë blerjes masive të votës tani pas votimit. Ai nuk është ndalur me kaq duke vazhduar më tej se hajduti nuk gjykohet se quhet fitues.
“Pra morali i fabulës analitike “të pavarur” është se Opozita duhet të ketë turp për:
– kapjen në flagrancë të blerësve të kartave, para votimit.
– denoncimin që po i bën blerjes masive të votës, tani pas votimit.
Ndërsa hajduti nuk gjykohet se quhet fitues.
Pra kush flet duhet të ketë turp, ndërsa kush vjedh i bëftë mirë. Kush flet duhet dorëhiqet, kush vjedh iu shtofshin duart..!!
Ky është në fakt morali që justifikon çdo formë korrupsioni”, shkruan Manjani.
Kujtojmë se më datë 25 prill u mbajtën zgjedhjet parlamentare në Shqipëri, ku fituese doli Partia Socialiste me 74 mandate, ndërsa Partia Demokratike 59 mandate, LSI-ja fitoi 4 mandate dhe PSD-ja mori 3 mandate. Risi në këto zgjedhje ishin listat dhe zgjedhja e kandidatit preferencial. Gjithashtu jashtë parlamentit mbetën emra të njohur të politikës si Pandeli Majko, Mimi Kodheli etj.
