Gjykata Kushtetuese ka pranuar ankesën e opozitës për ndryshimin e rregullores së Kuvendit. Lajmin e ka dhënë vetë Gjykata, e cila përmes një njoftimi publik thekson se kjo çështje do kalojë në seancë plenare.
Kujtojmë se deputetë të grupimit të Bardhit dhe grupimit të Rithemelimit kanë qenë kundër disa ndryshime në rregulloren e brendshme të Kuvendit, të cilën socialistët e votuan brenda disa minutash.
Në padinë e bërë nga opozita thuhet se kjo rregullore e re, përmes së cilës deputetët rrezikojnë deri në 60 ditë përjashtim, shkel të drejtat e tyre, si edhe lë qytetarët pa përfaqësues në Parlament. Madje sipas tyre ndryshimet janë bërë nga mazhoranca pa konsultim dhe i japin PS-së mundësi për ndëshkime arbitrare.
Tashmë depuetët nëse nuk sillen sipas rregullave të vendosura në Kuvend, shkaktojnë kaos dhe bllokojnë seancat plenare do të pezullohen nga 30-60 ditë nga Kuvendi, duke iu hequr e drejta që të kenë mundësi të marrin pjesë edhe në Komisionet e Kuvendit.
Njoftimi i Gjykatës Kushtetuese:
Në datën 19 dhjetor 2023, një grup prej 45 deputetësh të Kuvendit të Republikës së Shqipërisë, ka paraqitur në Gjykatën Kushtetuese kërkesë për shfuqizimin e vendimit nr. 126/2023, datë 14.12.2023 të Kuvendit “Për disa shtesa dhe ndryshime në vendimin e Kuvendit nr. 166, datë 16.12.2004 “Për miratimin e Rregullores së Kuvendit të Republikës së Shqipërisë, të ndryshuar””, si të papajtueshëm me Kushtetutën e Republikës së Shqipërisë, si edhe pezullimin e zbatimit të tij deri në dhënien e vendimit përfundimtar nga Gjykata.
Kolegji i Gjykatës Kushtetuese, me vendimin e datës 25.01.2024, vendosi kalimin e çështjes për shqyrtim në Mbledhjen e Gjyqtarëve, e cila, sot, në datën 07.02.2024, vendosi kalimin e çështjes për shqyrtim në seancë plenare mbi bazë të dokumenteve.
Në lidhje me kërkesën për pezullim, me shumicën e votave, Mbledhja e Gjyqtarëve vendosi shqyrtimin e saj në seancë plenare.
Për shkak të natyrës së kësaj çështjeje dhe pretendimeve e kërkimeve të parashtruara, shqyrtimi i saj do të bëhet nga Gjykata me përparësi, duke reduktuar, për këtë arsye, edhe afatet e palëve për paraqitjen e parashtrimeve dhe të qëndrimeve të tyre.
