Gjykata e Elbasanit ka marrë vendimin për dy të arrestuarit që dyshohet të kenë lidhje me atentatin ndaj Emiljano Ramazanit të ndodhur më 21 korrik.
Gjykata ka vendosur ‘arrest me burg’ për babë e bir, Albert 64 vjeç dhe Seit Manehasa 37 vjeç, të cilët u arrestuan tre ditë më parë pasi policia gjeti armën e përdorur në servisin e tyre.
Pas informacioneve të grumbulluara gjatë punës hetimore se në ambientet e biznesit të këtyre shtetasve në Peqin ishte fshehur arma e krimit, është ushtruar kontroll i befasishëm dhe si rezultat, në ambientet e brendshme të biznesit, poshtë sabratorit të një makine u gjet një armë zjarri pistoletë model 54 TT, me një krehër dhe një fishek luftarak.
Nga veprimet e mëtejshme hetimore dhe nga provat shkencore ka rezultuar se arma e zjarrit e sekuestruar është arma e zjarrit pistoletë e përdorur në ngjarjen e datës 20.07.2020, në Elbasan, ku është vrarë shtetasi E. R.
Ndërkohë kujtojmë që edhe ditën e djeshme u arrestua “Loku i Peqinit” mik me anëtarët e familjes Manehasa pasi ishte ky që vuri armën në sabratorin e makinës.
Emiljano Ramazani, 39 vjeç u ekzekutua më 21 korrik në vendin e quajtur “Rrethrrotullimi i luleve”. Viktima është qëlluar me breshëri plumbash nga një makinë në ecje, që kishte minimumi dy persona brenda.
Ramazani, është një person me precedentë të mëparshëm penal dhe emër i njohur për policinë.Në vitin 2012 gjatë operacionit të koduar “Tabakane 2”, Emiliano Ramazani i njohur edhe me nofkën “Rramani” dhe “Ili” u arrestua së bashku me 5 të tjerë pasi prokuroria kishte prerë fletë arresti për prodhimit dhe mbajtjes së lëndëve narkotike të kryer në bashkëpunim në formën e shitjes më shumë se një herë.