Kanë kaluar gjashtë muaj nga nata e 16 marsit, kur diskoteka “Puls” në Koçan të Maqedonisë së Veriut u përfshi nga një zjarr i fuqishëm që shkaktoi vdekjen e 62 të rinjve dhe plagosjen e mbi 200 të tjerëve. Hetimet kanë treguar se shkak i flakëve u bënë mjetet piroteknike që ndezën materialet e brishta në tavan, ndërkohë që lokali kishte vetëm një dalje dhe funksiononte pa leje të vlefshme.
Ngjarja nxori në pah një sërë shkeljesh institucionale, duke përfshirë leje të falsifikuara, mungesë kontrollesh dhe mosveprim nga inspektorët. Për këtë arsye, Prokuroria ka ngritur akuza ndaj 34 personave dhe tre kompanive, mes tyre ish-kryetarë komunash, ish-ministra, zyrtarë dhe inspektorë. Së fundmi, në listën e të akuzuarve është përfshirë edhe pronari i kompanisë së sigurimit “Rubikon”, i dyshuar për mosrespektim të standardeve të sigurisë.
Edhe pse aktakuza u dorëzua në qershor, Gjykata Penale ende nuk ka caktuar një seancë gjyqësore, pasi po shqyrton rreth 40 ankesa. Procedura vijon të mbetet në fazën e vlerësimit, duke zgjatur pritjen për një proces gjyqësor të plotë.
Familjarët e viktimave nuk ndalen së kërkuari drejtësi. Çdo të shtunë ata zhvillojnë “Marshin e engjëjve” në Koçan, ndërsa kanë shpallur edhe një thirrje për një tubim të heshtur në sheshin kryesor të Shkupit.
“Duhet të ketë drejtësi, Koçani nuk guxon të mbahet mend vetëm si qyteti i dhimbjes,” shprehen ata.
