Në konferencën e sotme për mediat, në takimin e nismës “Open Balkan”, njëri nga gazetarët e Maqedonisë së Veriut ka vënë në siklet dhe ka ‘djersitur’ presidentin e Serbisë, Aleksandër Vuçiç. Teksa gazetari maqedonas i bëri një pyetje Vuçiç i tha nëse e donte përgjigjen anglisht apo serbisht. Në këtë moment ka ardhur edhe reagimi i gazetarit maqedonas i cili i thotë presidentit serb se e do përgjigjen në shqip. Pas kësaj ka ardhur replika e Vuçiç i cili i tha gazetarit se nuk e ka mësuar ende shqipen. Ndërkohë sipas presidentit serb, ‘Open Balkan’ është një iniciativë për të përgatitur të ardhmen për fëmijët, për të mundësuar lidhjen e qytetarëve dhe shkëmbyer eksperienca.
Dialogu mes gazetarit dhe Vuçiç:
Gazetari: Serbia ka hapur 4 kapitujt. Mali i Zi ka publikuar metodologjinë e re. Maqedonia dhe Shqipëria presin ende për shkak të dështimit të BE që të çelë negociatat. A mendoni se shpejtësitë e ndryshme të integrimit do të kenë efekt në këto nisma kontruktivë? Vuçiç: Doni t’ju përgjigjem në anglisht apo në serbisht? Gazetari: Në shqip. Vuçiç: Për fat të keq nuk flas dot shqip, më duhet ta mësoj.
Kujtojmë se këtë të martë po mbahet Samiti i “Ballkanit të Hapur” në Tiranë, takim mes kryeministrit Edi Rama me presidentin e Serbisë Aleksandër Vuçiç dhe kryeministrit të Maqedonisë së Veriut, Zoran Zaev.
