Portieri i Shqipërisë, Thomas Strakosha, ka folur për prestigjiozen “The Guardian” në Angli, ku ka folur për kamponatin britanik, ndeshjen mes Shqipërisë dhe Anglisë, si dhe për një kalim të mundshëm të tij nga Lazio në një prej skuadrave të Premier League. Mes të tjerash, gardiani kuqezi tha: “Është diçka entuziazmuese të përballesh me Anglinë për ne dhe një moment i madh për të gjithë sepse Anglia ka disa nga talentet më të mëdhenj në botë dhe se Premier League është kampionati më i mirë në botë. Të luash ndaj lojtarëve të tillë të lë të kuptosh se je në një nivel për të konkurruar me ta.
Fitore ndaj Anglisë? Mendoj se do të ishte e pabesueshme, sidomos tani me situatën e Covid-19. Do të ishte diçka shumë e mirë për tifozët sepse ka qenë periudhë shumë e vështirë për ta. A më tërheq kampionati anglez? Më pëlqen sesi luajnë në Premier League.
Ata luajnë shpejt, ka shumë gjuajtje drejt portës dhe ke shumë punë për të bërë. Mua më pëlqen të kem shumë punë sepse më lejon të tregoj më të mirën dhe më rrit adrenalinën. Unë besoj se Premier League ka futbollin më të mirë: shpejtësinë, reagimi që ke kur sheh një ndeshje… Sheh ndeshje ku rezultati është 3-0 deri në minutën e 88 e pastaj mbyllet 3-3”.
