Opozita e bashkuar nuk ka ende një qëndrim nëse do i përgjigjet pozitivisht apo do të refuzojë ftesën e kryeministrit Edi Rama për diskutuar në Këshillin Politik mbi ndryshimet kushtetuese për hapjen e listave dhe koalicioneve parazgjedhore.
Në selinë blu ka mbërritur mesditën e sotme nënkryetari i LSI-së, Petrit Vasili, i cili po zhvillon diskutime mbi këtë çështje me aleatët demokratë. Nga partia e Monika Kryemadhit duket se ka një prirje për të refuzuar ftesën e Ramës, por Partia Demokratike nuk ka ende një qëndrim përfundimtar.
Raportohet se opozita e bashkuar mund të kërkojë një shtyrje të takimit për nesër, si dhe për temat që do të diskutohen.
PD dhe LSI folën dje për zhbërje të marrëveshjes së 5 qershorit për kodin zgjedhor, pasi Partia Socialiste firmosi marrëveshjen me opozitën paralamentare që i hap rrugë vendimit për të ndaluar koalicionet parazgjedhore.