Frikë nga tërmeti, Greqia dërgon ekipe shpëtimi në Santorini

Autoritetet greke kanë ndërmarrë masa emergjente në ishullin e Santorinit pas një rritjeje dramatike të aktivitetit sizmik, me mbi 200 lëkundje të regjistruara brenda 48 orëve.

Për të garantuar sigurinë e banorëve dhe turistëve, në zonë janë dërguar forca speciale, ekipe shpëtimi, dronë dhe tenda emergjente.

Duke pasur parasysh rrezikun e një tërmeti më të fuqishëm, i cili mund të shkaktonte edhe një cunami, qytetarët janë këshilluar të shmangin vijën bregdetare dhe ndërtesat e vjetra, të zbrazin pishinat dhe të mos mblidhen në hapësira të mbyllura.

Ministria e Mbrojtjes Civile ka njoftuar gjithashtu mbylljen e shkollave të hënën si një masë paraprake.

Profesori i gjeofizikës në Universitetin Aristotele të Selanikut, Kostas Papazachos, deklaroi se situata mbetet e pasigurt:

“Asgjë nuk mund të përjashtohet, ndaj këto masa janë të nevojshme për të kufizuar ndikimin e një tërmeti të mundshëm.”

Megjithëse Greqia ndodhet në një zonë të ndjeshme ndaj tërmeteve, ekspertët theksojnë se lëkundjet e fundit janë rezultat i lëvizjeve tektonike dhe jo aktivitetit vullkanik.

Krahas Santorinit, masa të ngjashme sigurie janë marrë edhe në ishujt Amorgos, Ios dhe Anafi.