Ajo do të mbahet nga çdo shtetas britanik si fillim në çantë ose në portofol, njësoj si patenta e makinës ose karta bankare, më pas do të jenë edhe qytetarët e shteteve të BE-së që do ta kenë…
Bëhet fjalë për “kartën sanitare” ose kartën e vaksinimit, që çdo britanik i vaksinuar me anti-COVID duhet ta ketë me vete kudo që do të udhëtojë.
Kështu kanë thënë sot autoritetet më të larta shëndetësore në Mbretërinë e Bashkuar, sipas të cilëve britanikëve do t’u dorëzohet një kartë vaksinimi e anti-Covid-it, që provon që e kanë marrë vaksinën dhe paralajmërohen, se ajo duhet mbajtur me çdo kusht me vete në çantë ose në portofol, raporton sot “Daily Mail”.
Ndërkohë po sot në Shqipëri, qeveria dhe Ministria e Shëndetësisë, u krenuan pasi nëntë muaj pas nisjes së pandemisë, arritën të siguronin në vend testet e shpejta që verifikojnë prekjen nga virusi ose jo.
Ndërkohë çështje si të respiratorëve apo testimeve që tashmë kudo bëhen falas, në botë tani janë eliminuar dhe po flitet vetëm për vaksinën.
Shqipëria, abuzime edhe me shitjen e testeve
Në një kohë që shtetet e para të Europës kanë nisur bërjen e vaksinave, Shqipëria është një model i keqmenaxhimit dhe i prapambetjes së masave për të luftuar koronavirusin.
Në vend jo vetëm që nuk po flitet për sigurimin e asnjë doze vaksinash as këtë vit dhe as vitin që vjen, por edhe me testet e përcaktimit nëse je i infektuar apo jo, bëhen shumë abuzime.
Pak ditë më parë në pikët e kalimit kufitar me Greqinë u zbuluan rastet e para të manipulimit ose falsifikimit të testeve anti-Covid, ku si pasojë e këtij skandali shteti Helen u detyrua të rimbyllë pik-kalimet doganore me Shqipërinë.
Nga ana tjetër edhe çmimet abuzive të testimeve si në shtet ashtu edhe në privat, pra bërja e tamponit të famshëm, apo testit PCR, janë një problem më vete abuzimesh dhe mashtrimesh.
Por asnjë autoritet shtetëror nuk po merret aspak me këtë çështje për ta rregulluar ose hetuar, në një kohë që shifrat me infektime dhe vdekje rriten për ditë në vend.
E në një kohë që situata në vend rrëndohet, kryeministri Edi Rama bën vetëm polemika me anëtarët e Komitetit të Ekspertëve dhe në vend që t’i dëgjojë ai ata, janë ata që dëgjojnë kryeministrin që bënë “ekspertin” duke ngatërruar çdo gjë.
Arritja e britanikëve
Britania e Madhe ka publikuar sot lajmin për ato që do të njihen si kartat e vaksinimit. Miliona qytetarë britanikë do të marrin të tilla karta për të provuar se janë vaksinuar.
Sipas “Daily Mail”, qytetarët janë paralajmëruar që këto karta t’i mbajnë me vete kudo.
Katër milionë doza të vaksinës së “Pfizer” do të marrin qytetarët britanikë deri në fund të dhjetorit. Britania u bë i pari vend perëndimor që miratoi përdorimin e vaksinës. Ata kanë porositur me kohë vaksinat te kompanitë “Pfizer” dhe “Moderna”, raportonte “Daily Mail”.
Britania e Madhe ditën e sotme ka nisur gjithashtu edhe vaksinimin anti-Covid në popullatë. Sipas mediave të huaja, miliona britanikë do të pajisen me një mjet identifikimi për të treguar se janë vaksinuar.
Karta përmban hapësirë të detajuar për emrin e vaksinës, numrin e saj dhe datën kur është injektuar. Megjithatë, ekziston shqetësimi se ato mund të falsifikohen, pasi nuk kanë foto dhe detaje të tjera lidhur me “pronarin” e saj.
Por edhe kjo duket se shumë shpejt do të “zgjidhet”, pasi autoritetet po punojnë për modele të reja të këtyre kartave me më shumë të dhëna dhe elementë sigurie.
/Burimi: Daily Mail/ Përshtati: Iconstyle.al/
