Fluks i madh pushuesish në pikën doganore të Morinës.Edhe këtë fundjavë pika kufitare me Kosovën përballoi fluks të madh të automjeteve të vogla dhe autobuzave me destinacion bregdetin shqiptar.
Nga të dhënat e policisë kufitare bëhet e ditur për hyrjen në Shqipëri të mbi 8 mijë qytetarëve kosovarë dhe 2 mijë automjeteve vetëm në orët e para të mëngjesit të së shtunës.
Ky fluks me një numër 6 mijë qytetarë të Kosovës është shënuar edhe mëngjesin e së premtes. Dogana e Morinës gjatë fundjavave po punon me kapacitet të plotë të sportele 6 si dhe me procedurë të përshpejtuar për shmangien e radhëve në hyrje të vendit tonë. Sipas të dhënave të policisë së Kosovës në 11 ditëshin e fundit bregdeti shqiptar dhe qytetet historike patën 80 mijë vizitorë nga Kosova.
Ndërkohë ministria e Shëndetësisë iu bën thirrje pushuesve që të respektojnë masat anti-COVID-19. MSH ka publikuar sot edhe 10 rregullat që duhet të respektohen.
Pastrimi dhe dezinfektimi duhet të zbatohen me rigorozitet në bare, restorante, shezlone dhe në çdo ambient. Në strukturat akomoduese duhet të ruhet distancimi fizik jo më pak se 1.5 meter. Stafi i shërbimit në kontakt me pushuesit apo vizitorët duhet të mbajmë domosdoshmërisht maskë. Kujdes me përdorimin e ashensorit, respektoni distancimin dhe higjenen. Hapësira midis ndenjëseve dhe çadrave të pushuesve duhet jo më pak se 3.5 metër distancë. Shmangni grumbullimet e çdo lloji. Shmangni ambientet e mbyllura, konsumoni ushqim në ambiente të hapura. Mos këmbeni aksesorët e plazhit me të tjerët. Ruani higjenën vetjake. Nëse keni temperaturë mos u nisni për udhëtim dhe mos frekuentoni plazhin.