Deputeti i Partisë Demokratike, Flamur Noka i është përgjigjur kryedemokratit Lulzim Basha lidhur me akuzat që ky i fundit lëshoi ndaj tij.
Noka ka reaguar ditën e sotme me një postim të shkurtër në rrjetin e tij social “Facebook”, ku ka shkruar në lidhje me vendimin e kreut të PD-së Lulzim Basha për t’a shkarkuar nga posti i nënkryetarit të Komisionit të Sigurisë, si dhe duke e paralajmëruar për përjashtim nga Grupi Parlamentar i PD-së.
Në postimin e tij Noka shkruan se Basha po e ‘lufton’ Ramën duke përjashtuar dhe përçarë demokratët. Më tej ai thotë se Basha pranon që qëllimi i tij është rrëzimi nga pushteti i kryeministrit Edi Rama, por në fakt me vepra bën të kundërtën.
Postimi i plotë:
“Me goje e thote qe qellimi eshte rrezimi i Rames ,nderkohe ky i fundit vazhdon te mbreteroje i qete ne pushtet per 12 vjet .Me vepra pengu i tij po e “lufton “ate duke perjashtuar dhe percare demokratet…..”.
Pas shkarkimit të deputetit Flamur Noka nga posti i tij si nënkryetar i Komisionit për Sigurinë Kombëtar, reagime të forta kanë ardhur nga figura të rëndësishme të Partisë Demokratike. Kundër vendimit të marrë nga kryetari Lulzim Basha, dolën që mbrëmë Albana Vokshi dhe Tritan Shehu, ndërsa sot “grupit” i janë bashkuar edhe Jozefina Topalli, Fatbardh Kadilli dhe Edmond Spaho. Të gjithë njëzëri akuzojnë Bashën për “autokraci”, ndërsa ish-kryeparlamentarja Topalli paralajëmroi dhe përjashtime të tjera.
Kujtojmë se gjatë mbrëmjes së djeshme menjëherë pas debateve në mbledhjen e Kryesisë së PD, kryedemokrati Lulzim Basha vendosi të shkarkojë Flamur Nokën. Noka u shkarkua pasi akuzohet se ka shpifur ndaj kryetarit të PD, dhe ka shpikur qëndrime të pathëna, referuar deklaratave të Nokës se Basha e ka quajtur anëtarësinë e PD-së, “llum”.
