Mjeku reanimator Roland Xhaxho la ditën e sotme spitalin Infektiv, ku ka qëndruar 18 ditë pas infektimit nga koronavirusi.
Së fundmi, me anë të një lidhjeje me Skype për “Open” mjeku ka folur me shumë rreth eksperiencës si i infektuar, duke treguar dhe shenjat e para të sëmundjes:
“Kur iu bashkova stafit për ndihmën ndaj Covid-19 kam lëvizur shumë. Kam lëvizur deri në Kavajë, por duke qenë se ky virus është i lehtë ka mundësi ta kem marrë nga ajri. Pas disa ditësh më filloi temperatura dhe u shtrova në spital për të qenë në kontroll të vazhdueshëm, për të shmangur ndonjë gjendje akute. Kjo lloj sëmundjeje ka problem pulmonar, pra duhet të oksigjenohet organizmi dhe truri.Nëse truri nuk furnizohet me oksigjen, nuk funksionon si zakonisht.”
Xhaxho tha se një nga frikërat e tij më të mëdha gjatë qëndrimit në spital, përveç faktit se mund të kishte infektuar persona të tjerë, ka qenë fakti se virusi mund t’i shkaktojë probleme të tjera sepse sipas tij Covid-19 lë pasoja tek të prekurit.
“Natyrisht frika më e madhe ishte mos kam infektuar persona të tjerë po fatmirësisht asnjë nuk ka rezultuar pozitiv. Më pas gjatë qëndrimit në spital mendoja se ndoshta virusi mund të linte pasoja anësore tek unë, sepse siç e kam thënë ky virus shkakton shumë probleme në organizmin e njeriut. Kam vënë re se virusi nuk prek vetëm mushkëritë por edhe organe të tjera. Frika ime më e madhe ishte mos prekej ndonjë organ tjetër. Por, fatmirësisht ia dola.”
Më tej, tha se gjatë 18 ditëve në spital i pëlqente të dëgjonte muzikë me zë të lartë, teksa ka zbuluar se të shtruarit e tjerë ishin shumë në ankth e të friksuar.
Po ashtu, reanimatori duket se nuk është shkëputur nga detyra e tij sepse ka qenë vazhdimisht në komunikim me kolegët rreth situatës në spital, duke ndarë eksperiencën e tij shumë të vlefshme.
“Gjatë kohës që isha në spital vura re se numri i pacientëve me Covid-Covid siç isha unë ishte i paktë. Kishte një numër të madh pacientëve që vuanin dhe nga patologji të tjera dhe infektimi i tyre me virusin përkeqësonte gjendjen e tyre shëndetësore.Mua më pëlqen të d1%gjoj muzikë, por gjatë kohës që isha i shtruar doja ta dëgjoja me volum të lartë. Kështu të gjithë e dallonin cila ishte dhoma ime.”
Lidhur me situatën aktuale në vendin tonë, mjeku u shpreh optimist duke thënë se situate do përmirësohet dhe se personat që gëzojnë shëndet të plotë mund t’i kthehen jetës normale.
