Përkundër zotimeve të përsëritura të kryeministrit Edi Rama se “Francesco Becchetti nuk do të merrte kurrë asnjë qindarkë nga Shqipëria”, biznesmeni italian sapo ka ekzekutuar me sukses vendimin e arbitrazhit ndërkombëtar, duke marrë 110 milionë euro nga të ardhurat e hapësirës ajrore shqiptare. Këto para, të cilat përbëjnë taksat e shqiptarëve, mbaheshin të bllokuara në llogarinë e Eurocontrol që nga dhjetori 2020 dhe tashmë kanë përfunduar në llogaritë e biznesmenit italian.
Përmes një njoftimi zyrtar dërguar tre ditë më parë, Eurocontrol informoi qeverinë shqiptare dhe Albcontrol se përmbaruesi i Becchetti-t ka finalizuar ekzekutimin e vendimit të arbitrazhit, pas miratimit nga gjykata belge. Kapitali konfirmoi këtë zhvillim përmes tre burimeve të pavarura, si në ministritë shqiptare ashtu edhe në Belgjikë, ndërsa njoftimi zyrtar mbahet ende rreptësisht konfidencial nga qeveria.
E përballur me këtë disfatë të kushtueshme, administrata qeveritare po përpiqet të shmanget nga përgjegjësia duke orkestruar një fushatë mediatike që pretendon korrupsion në procesin e arbitrazhit. Një investigim i porositur nga vetë qeveria hedh dyshime mbi procesin, duke pretenduar se Becchetti ndikonte në përzgjedhjen e gjyqtarëve – pretendime që sidoqoftë nuk ndryshojnë aspak realitetin e ri financiar që do të peshojë mbi shpatullat e taksapaguesve shqiptarë.
Dokumentet e arbitrazhit tregojnë qartë se kjo humbje e paprecedentë financiare erdhi si rezultat direkt i veprimeve të zyrtarëve të lartë qeveritarë. Deklarimet publike kërcënuese të kryeministrit Rama kundër Becchetti-t u konsideruan nga gjykata si prova të qarta të persekutimit politik.
Përgjegjësia shtrihet edhe te zyrtarë të tjerë të lartë. Kryebashkiaku Erion Veliaj u përfshi në kërcënime të dokumentuara përmes SMS-ve ndaj gazetarëve të Agon Channel që i filmuan dasmën, ndërsa Sekretari i Përgjithshëm i Kryeministrisë, Engjëll Agaçi, sipas dëshmive në gjykatë, kishte përdorur gjuhë kërcënuese ndaj Becchetti-t gjatë një takimi në ish-restorant “Berlini” në Tiranë.
Shuma prej 110 milionë eurosh shënon dëmin më të rëndë financiar që Shqipëria ka pësuar ndonjëherë nga një arbitrazh ndërkombëtar. Këto para, që vijnë nga tarifat e përdorimit të hapësirës ajrore shqiptare, do të kenë ndikim të drejtpërdrejtë në buxhetin e shtetit dhe do të rëndojnë mbi shërbimet publike për qytetarët.
Ky dëm, shkaktuar nga menaxhimi i papërgjegjshëm i marrëdhënieve me investitorët e huaj, do të vazhdojë të ndikojë negativisht në ekonominë shqiptare për vite me radhë. Ndërkohë që qeveria përpiqet të minimizojë impaktin politik të kësaj disfate, realiteti mbetet i pandryshuar: taksapaguesit shqiptarë do të paguajnë çmimin e vendimeve të gabuara politike për një kohë të gjatë.
