Parlamenti ka miratuar dje ligjin për faljen e detyrimeve të pensioneve të ish-ushtarakëve.
Në këto kushte merr automatikisht zgjidhje problemi i ish-ushtarakëve me propozim deputeti të Kryetarit të Kuvendit, z. Gramoz Ruçi.
Kjo zgjidhje vjen nëpërmjet ligjit “Për faljen e detyrimeve të ushtarakëve ndaj fondit të sigurimeve shoqërore, të krijuara si diferencë nga rishqyrtimi i pensioneve të parakohshme për vjetërsi shërbimi”, një problemi të hershëm të ngritur nga komuniteti i ish-ushtarakëve, që figuronin debitor ndaj Fondit të Sigurimeve Shoqërore, si pasojë e legjislacionit të ndryshuar shpesh e të paqëndrueshëm.
Gjatë shqyrtimit të projektligjit në Komisionin për Ekonominë dhe Financat pak ditë më parë, mori pjesë edhe Shoqata Aleanca Kombëtare e Ushtarakëve të Shqipërisë.
Ushtarakët shprehën shqetësimin se projektligji i paraqitur, zgjidh një pjesë të problematikave të ushtarakëve dhe se zgjidhja e plotë e problematikave të tyre kërkonte ndryshime të thella ligjore.
Në këtë kuadër, Z. Agim Binaj Administrator i Shoqatës, propozoi që në pikën 1 të nenit 1 të projektligjit, të shtohet edhe falja e detyrimeve të ushtarakëve ndaj fondit të sigurimeve shoqërore, të krijuara si pasojë endryshimit të vazhdueshëm të legjislacionit.
Ky sugjerim u dha gjithashtu edhe nga disa anëtarë si deputeti Sinaj, por në përfundim, pas shqyrtimit me përfaqësues të Ministrisë së Financave, Komisioni e rrëzoi propozimin për të shtuar edhe kategorinë e ushtarakëve me vendime administrative nga Instituti i Sigurimeve Shoqërore.
Lidhur me këtë pikë, Ministria e Financave u shpreh se ky propozim do të kishte efekt të lartë në të ardhurat dhe për buxhetin aktual është e pamundur të përballohet, ndaj nuk e dakortëson atë. Pra edhe në versionin përfundimtar ky propozim nuk u pranua dhe nuk u miratua dje në Parlament.
Projektligji i miratuar do të fal kështu borxhet e ushtarakëve ndaj fondit të sigurimeve shoqërore të krijuara si diferencë nga rishqyrtimi i pensioneve të parakohshme për vjetërsi shërbimi të caktuara sipas vendimeve gjyqësore të formës së prerë.
“Në nenin 1, pika 1, riformulohet me këtë përmbajtje: “1. Falen detyrimet e ushtarakëve ndaj fondit të sigurimeve shoqërore, të krijuara si diferencë nga rishqyrtimi i pensioneve të parakohshme për vjetërsi shërbimi, të caktuara sipas vendimeve gjyqësore të formës së prerë, bazuar në kriteret e Vendimit Unifikues të Kolegjeve të Bashkuara të Gjykatës së Lartë nr. 3, datë 24.11.2016””, thuhet në projektligj./Gazetareforma.com/
