Eros Grezda ka zgjedhur që të zhvillojë një betejë ligjore me ish-klubin e tij, Rangers.Në një intervistë për median e shkruar “Panorama Sport”, sulmuesi anësor i Kombëtares tregoi se do të procedojë në FIFA ndaj skuadrës së Rangersit, për mjekim të gabuar kur ishte pjesë e tij, në sezonin 2018-2019.
“Kam përfunduar të gjithë fazën përgatitore në mënyrë të mirë me ekipin e ri. Kisha një lëndim të vogël së fundmi pas përgatitjeve dhe qëndrova jashtë gati 10 ditë. Mirëpo, besoj që shumë shpejt do të kap ritmin që të jem gati për ndeshjet dhe të filloj që të luaj normalisht me ekipin e ri.
Kam hedhur në gjyq Rangersin, është e vërtetë. Me këtë punë jam marrë vitin e fundit. Dhe për të gjithë këtë që më ka ndodhur ka vetëm një fajtor, që është klubi i Rangers dhe stafi mjekësor i tij, që ma kanë mjekuar këmbën në mënyrën më të keqe të mundshme. Prandaj jam duke u marrë edhe me këtë çështje.
Avokatët e mi kanë qenë në komunikim direkt me klubin e Rangersit, mirëpo ata refuzojnë kategorikisht që të pranojnë se e kanë bërë mjekimin e gabuar. Prandaj, fillimisht ne kemi provuar që ta zgjidhim këtë çështje mes meje dhe klubit në mënyrë paqësore. Ngjarjet po zhvillohen ditët e fundit dhe me sa kam parë unë, ato kanë refuzuar gjithçka. Tani do të procedojmë në FIFA”, u shpreh sulmuesi kuqezi.
