Transporti publik konsiderohet rreziku më i madh në këtë periudhë për transmetimin e infeksionit të Covid-19.
Specialistët e shëndetësisë vënë re shkelje të masave nga operatorët privatë dhe mungesë kontrollesh nga bashkia.
Në një intervistë për A2CNN epidemiologu Ilir Alimehmeti këmbëngul se linjat urbane nuk duhet të hapeshin në këtë fazë. Ai këshillon qytetarët të shmangin sa më shumë lëvizjet me urbane.
“Transportin publik nëse është e mundur evitoje, nëse është e mundur ec merr një biçikletë… sa të jetë e mundur evitoje.”
Në këtë periudhë ku e gjithë bota po nxit përdorimin e maskës dhe distancimit fizik për të frenuar përhapjen e virusit, në popullsinë shqiptare vihet re neglizhencë në zbatimin e tyre edhe pse specialistët këmbëngulin se këto masa janë mënyra e vetme për të na ruajtur nga infektimi.
“Distancë, higjenë, maskë dhe evitimi i grumbullimeve”, është apeli që epidemiologu Alimehmeti bën për qytetarët.
Ndërsa në spitale, veçanërisht në QSUT-në e kthyer në vatër infeksioni, Alimehmeti propozon zbatimin e protokolleve të veçanta. Testim të gjithë punonjësve dhe pacientëve para se të hyjnë në spitale.
Rastet ditore dhe humbjet e jetës nga Covid-19 në këtë periudhë nuk konsiderohen alarmante nga specialisitët. Referuar shtrimeve në spital, të prekurve të rinj dhe viktimave epidemiologët thonë se jemi në një situatë të qëndrueshme, por që nevojitet kujdes.
Ndërkohë edhe Erion Dasho, Ekspert i Shëndetit Publik ka bërë një rekomandim, të cilin e ai e ka cilësuar si urgjent.
Në një postim të tijin në Facebook, Dasho u bën thirrje personave mbi 65-vjeç apo edhe atyre që janë të prekur nga sëmundje kronike që ta evitojnë transportin publik me çdo kusht.
“….Ta evitojnë me çdo kusht transportin publik deri sa të krijohet bindja se ky sistem do të zhvillohet i sigurt,” shkruan më tej Dasho.
Sipas tij, “mbajtja e maskës nga ju vetë nuk mjafton dhe nuk ofron mbrojtje të mjaftueshme në se të gjithë pasagjerët në mjet nuk respektojnë distancimin fizik dhe mbajtjen e maskave.”