Tedi Blushi, zëdhënësi i Presidencës ka deklaruar se zyrtari i Departamentit Amerikan të Shtetit, Philip Reeker nuk ka kërkuar asnjëherë në mënyrë zyrtare që të zhvilloj një takim me Presidentin e Republikës, Ilir Meta.
Pas shkrimit të publikuar nga Zëri i Amerikës, ku një zëdhënës i ambasadës amerikane shprehej se Reeker nuk u takua me Presidentin Ilir Meta për arsye axhende, Blushi ka sqaruar situatën.
Me anë të një prononcimi për SYRI TV, zëdhënësi i Presidencës tha se nga institucioni i presidentit nuk ka pasur asnjë kërkesë nga çdo lloj niveli për një takim me zyrtarin e DASH Reeker.
“Institucioni i presidentit nuk ka pasur asnjë kërkesë nga çdo lloj niveli për takim me Reeker’, ka thënë Tedi Blushi.
Më herët, një zëdhënës i ambasadës amerikane i tha Zërit të Amerikës se “për arsye të ndërtimit të agjendës, këtë herë nuk ishte i mundur një takim me presidentin e vendit Ilir Meta”.
Kujtojmë se ndihmës Sekretari i Shtetit në Detyrë për Çështjet Evropiane dhe Euroaziatike, Ambasadori Philip T. Reeker zhvilloi ditën e sotme një vizitë zyrtare në Tiranë. Gjithashtu në këtë vizit ai u takua me kryeministrin e vendit Edi Rama dhe kryetarin e Partisë Demokratike Lulzim Basha. Ndërsa ajo që ra në sy dhe bëri shumë përshtypje gjatë vizitës së zotit Reeker, ishte dhe mungesa e një takimi me presidentin Iir Meta.
