Një magazinë e shtetit në Lundër është përfshirë nga flakët mbrëmjen e sotme. Me anë të një njoftimi zyrtar Komisioni Qendror i Zgjedhjeve ka konfirmuar se magazinat e rezervave shtetërore në Lundër janë përfshirë nga flakët. Gjithashtu KQZ-ja thotë se zjarri nuk ka prekur materialet zgjedhore të 25 prillit pasi ato janë të ruajtura në një ambient tjetër, por pohon se janë djegur materiale të vjetra, të cilat sipas sajë janë nxjerrë jashtë përdorimit nga ana e institucioneve.
“Komisioni Qendror i Zgjedhjeve informon se mbrëmjen e sotme një nga ambjentet e institucionit në Lundër është përfshirë nga zjarri për arsye që ende nuk dihen. Në ambjentet të cilat ka ndodhur incidenti ka patur materiale të vjetra të KQZ-së, të cilat janë nxjerrë jashtë përdorimit nga ana e institucionit.
Materialet, dokumentacioni zgjedhor dhe çdo gjë tjetër që ka të bëjë me zgjedhjet e 25 prillit janë të ruajtura në një ambient tjetër që nuk ka lidhje me ambinetin ku ka rënë zjarri.
KQZ ka lajmëruar mënjëherë instancat përkatësë për të marrë masat e duhura për neutralizimin e zjarrit dhe për gjetjen e shkaqeve të këtij incidenti.”, njofton KQZ-ja.
Kujtojmë se një magazinë e shtetit në Lundër, ku ruheshin materiale zgjedhore është përfshirë nga flakët. Sipas burimeve zyrtare nga Policia e Tiranës thuhet se ngjarja ka ndodhur rreth orës 19:30 dhe se ka vetëm dëme materiale. Ndërkohë, dyshohet se zjarri ka rënë nga grumbullimi i baterive të makinave. Kujtojmë se grupi i zjarrfikëseve ndodhet në vendin e ngjarjes dhe po punojnë për fikjen e flakëve. Gjithashtu në vendin e ngjarjes ndodhet edhe grupi hetimor i cili po punon për sqarimin e rrethanave dhe përcaktimin e shkakut të rënies së zjarrit, ku paraprakisht dyshohet se zjarri ka ardhur nga nxehtësia e lartë të disa baterive.
