Prokuroria e Fierit ka kërkuar dënimin me burgim të përjetshëm për Azgan Mërnicën, 24-vjeçarin që akuzohet për vrasjen e efektivit të Forcave Speciale “Shqiponja”, Novruz Cenalia.
Pretenca u dha këtë të mërkurë në Gjykatën e Fierit, ku organi i akuzës paraqiti konkluzionet përfundimtare të çështjes.
Mërnica përballet me tre akuza: “vrasja e punonjësve të Policisë së Shtetit”, “mbajtja pa leje e armëve dhe municioneve” dhe “drejtimi i automjetit në mënyrë të parregullt”. Për këto vepra, prokuroria kërkoi burgim të përjetshëm në bashkim dënimesh.
Ngjarja ndodhi më 13 maj 2024 në fshatin Baltëz të Fierit. Sipas hetimeve, Mërnica, duke lëvizur me makinë me shpejtësi dhe pa kujdes në një kthesë, u përball me efektivin Cenalia, i cili i tërhoqi vëmendjen për mënyrën e drejtimit.
Ky moment solli përplasjen mes tyre. Mërnica ndaloi mjetin, zbriti me një çantë ku mbante armën, dhe shkoi drejt makinës së efektivit. Sipas aktakuzës, ai nxori armën, e mbushi dhe qëlloi me plumb në fytyrë Cenalian, duke i shkaktuar vdekjen e menjëhershme.
Novruz Cenalia ishte në detyrë dhe i identifikueshëm qartë për shkak të uniformës së “Shqiponjave”.
Pas krimit, Mërnica u largua dhe qëndroi i fshehur për 48 orë, ndërsa më pas u vetëdorëzua në polici me ndërmjetësimin e familjarëve.
Ai rrëfeu se pas vrasjes ishte strehuar fillimisht në shtëpinë e dajës së tij dhe më pas kishte lëvizur nëpër kanale, derisa uria e detyroi të kthehej.
