Lokalet në disa zona të Tiranës qëndruan të mbyllura sot, në shenjë proteste ndaj vendimit për lirimin e hapësirave publike.
Pronarët e bizneseve e konsiderojnë të padrejtë ndërhyrjen e autoriteteve, ndërsa theksojnë se janë taksapagues të rregullt dhe nuk janë njoftuar zyrtarisht për masat e marra.
“Ne paguajmë rregullisht taksën për ambientet e jashtme, sipas sipërfaqes së deklaruar. Pagesat bëhen në mënyrë transparente, nëpërmjet bankës. Vetëm unë paguaj rreth 1 milion lekë në vit. Pretendimi është se ndodhemi në hapësirë publike, por objekti ndodhet në një zonë private. Pavarësisht kësaj, na kërkohet ta lirojmë. Nuk kemi marrë asnjë dokument zyrtar, thjesht dikush kalon dhe thotë ‘është urdhër’. Por nëse ka një shkelje, të na jepet me shkrim, të nënshkruar, dhe të argumentohet mbi bazë ligjore”, shprehet Bledar Mehmeti, një nga pronarët e lokaleve.
Sipas tij, vetëm në kompleksin ku ndodhet lokali i tij operojnë mbi 40 biznese, që punësojnë më shumë se 600 persona. Nëse urdhri për lirimin e hapësirës zbatohet, qindra punonjës rrezikojnë të humbasin vendin e punës.
“Nëse tani punojnë 600 veta, me ndryshimin e kushteve mund të ulen në 150. Ky është kapaciteti real pa ambientet e jashtme. Kjo sjell jo vetëm humbje ekonomike, por edhe një efekt negativ moral për punonjësit, që fillojnë të ndihen të pasigurt. Kostoja për ambientet është e ndryshme për secilin, dikush paguan 100 mijë lekë në muaj, dikush tjetër 150 mijë”, shton Mehmeti.
Në shenjë reagimi, bizneset kanë paralajmëruar një protestë të organizuar të premten në orën 10:00 përpara Kryeministrisë, ku do të kërkojnë zyrtarisht rishikimin e vendimit dhe mbrojtjen e të drejtave të tyre.
