Lulzim Berisha është ish-anëtarë i bandës së Durrësit, i cili së fundmi ka plotësuar formularin e deklarimit të pasurisë pas kërkesës së OFL.(Lexo këtu)
Për të ka folur së fundmi ish-zv.drejtori i Policisë së Shtetit, Erzen Breçani, i cili ishte i ftuar mbrëmjen e sotme në Opinion.
Breçani tha se sekuestrimi i pronave që synon OFL-ja është një procedurë e cila i mbivendoset ligjit të Antimafias dhe është e vështirë.
Ai ndau dhe një kujtim nga karriera e tij kur ka shoqëruar Berishën, pasi ky i fundit ishte arrestuar në Maqedoni dhe po transportohej në Tiranë.
Ai tha se Lulëzim Berisha i kishte rrëfyer se personi që kishte më shumë frikë në Shqipëri ishte ish-kryeministri Sali Berisha, sepse sipas tij ai nuk pranon bashkëpunim dhe të ekzekuton për të tilla veprimtari.
“Unë kam shoqëruar Lulzim Berishën në aksionin kur ai është arrestuar dhe kam pasur një komunikim me të sepse e kisha në makinë. Në pyetje e sipër, mund të jetë duke më dëgjuar dhe duhet ta kujtojë shumë mirë, i thash ti je kriminel, ke vrarë. Ti e thua tha, ty i thash duhet të të sekuestrohet edhe pasuria. Kur është arrestuar ky nuk ka patur ligj Antimafia. Ai më tha mua që unë kam frikë vetëm një njeri në Shqipëri, ai është Sali Berisha sepse nuk pranon me bashkëpunu me të dhe të ekzekuton me u marr me veprimtari të tilla. Tha, unë e kam aq formim sa që dy troje të cilat i kam të miratume me leje ndërtimi i kam shit në kohë që i është bërë kontroll në banesën e tij dhe asnjë lloj pasurie nuk më gjeni”, tha Breçani.
