Një fasoneri në Kamëz është kthyer në një vatër të re të COVID-19.
“Balkanweb” shkruan se dy punonjëse të fasonerisë “ProDyn”, kanë rezultuar pozitive në testin e kryer.
Fasoneria në fjalë ishte mbyllur vetëm një javë dhe më pas kishte rifilluar sërish aktivitetin.
Mësohet se biznesi kishte marrë si masë mbrojtëse vetëm matjen e temperaturës së punonjësve.
Fasoneritë gjatë ditëve të fundit janë kthyer në vatra infeksioni në të gjithë vendin.
Ditën e djeshme në Krujë, u konfirmuan pozitive me COVID-19, 5 punonjëse të një fasonerie.
Gjithashtu, dy prej 11 rasteve të identifikuara gjatë 24 orëve të fundit në Shkodër, ishin po ashtu punonjëse fasonerie.
Kujtojmë këtu se kreu i PD, Lulzim Basha, i ka bërë thirrje qeverisë më herët që të mbyllë fasoneritë, për shkak të rrezikut që paraqesin në përhapjen e COVID-19.
Aktualisht në vendin tonë numërohen 539 raste me COVID-19, në mesin e të cilëve 283 të shëruar dhe 26 viktima.
Ditën e djeshme u regjistruar 21 raste të reja nga 253 teste të kryera.
