Një ngjarje e rëndë ka tronditur Tiranën, ku një vajzë është denoncuar se ka qenë viktimë e dhunës dhe e pengmarrjes nga disa persona.
Ditën e djeshme, RENEA dhe policia e Tiranës janë vënë në lëvizje për të ndërhyrë në një apartament në zonën e Astirit, pas një telefonate nga familjarët e vajzës, që lajmëruan për dhunën dhe kërcënimet me armë.
Mësohet se ishin 6 persona, 3 vajza dhe 3 djem të cilët prej mbrëmjes së të mërkurës ndodheshin në dy apartamente në katin e 8 të pallatit ku i kishin marrë me qira ditore.
Sipas informacioneve, apartamentet ishin marrë me qira nga një djalë me të cilin frekuentohej 21-vjeçarja Sajma Qordja.
Të rinjtë e kanë kaluar natën e së mërkurës deri në mesditën e së enjtes te të dy apartamentet, ku dyshohet se kanë konsumuar edhe lëndë narkotike.
Mesditën e djeshme 5 të rinjtë e tjerë 2 vajzat dhe 3 djemtë kanë zbritur poshtë pallatit për të konsumuar kafe, ndërsa Sajma Qordjan e kanë lënë në dhomë në gjumë dhe kur është zgjuar nga gjumi e reja ka parë dy armët e zjarrit pistoleta dhe jelekun antiplumb dhe më pas ka filluar të shfaqë paranoja dhe të bërtasë e frikësuar, ulërima që janë dëgjuar edhe nga banorët në pallat.
Familjarët e vajzës kanë lajmëruar policinë duke i thënë se vajza e tyre është rrëmbyer nga persona që kanë edhe armë dhe që e kanë dhunuar. Ndryshe nga njoftimi zyrtar i parë i policisë së Tiranës që deklaron se në sallën operative ka telefonuar vajza, por në polici, sipas gazetarit Igli Çelmeta, ka telefonuar babai i vajzës dhe daja ka bërë denoncim në polici.
Në momentin e ndihmës, vajza nuk ka hapur derën për të lënë policinë të futet dhe ka pasur një komunikim me babain përmes video-calls.
Pas ndërhyrjes së forcave speciale RENEA, ajo është çliruar dhe është gjetur në gjendje të rënduar psikologjike, duke thënë se ka qenë e frikësuar dhe e dhunuar, por më vonë ka deklaruar se nuk ka pasur dhunë fizike.
Gjatë kontrollit të apartamentit, u gjetën lëndë narkotike, armë dhe jelek antiplumb.
Policia ka nisur hetimet dhe ka identifikuar të gjithë personat e përfshirë në ngjarje.
