Ish-gjyqatrja e Krujës, Enkelejda Hoxha ka kërkuar gjykim të shkurtuar në seancën paraprake. Po ashtu, edhe të pandehurit e tjerë kanë pasur të njëjtën kërkesë.
Gjykim të shkurtuar në seancën paraprake kanë kërkuar Aldo Tabaku, Manuela Mallkuçi, Bledar Petani, Sajmir Petani, Altin Skëndaj, Gazmir Nezaj dhe Gentjan Nezaj. Ndërkohë, Gjykata e Posaçme është tërhequr për të marrë vendimin.
Kujtojmë që Enkelejda Hoxha u arrestua më 11 shkurt me urdhër të SPAK. Ajo kishte liruar nga burgu persona që kishin kryer vepra të rënda penale apo përbënin rrezikshmëri të lartë shoqërore. Më 7 nëntor të vitit 2017, Enkeleida Hoxha liroi nga burgu Genci Tafilin, vëllanë e Admir Tafilit, të dy emra shumë të njohur për drejtësinë shqiptare, të akuzuar dhe dënuar për disa vepra penale. Genc Tafili është liruar në vitin 2017 me kusht nga Gjykata e Krujës nga gjyqtarja Enkeleida Hoxha, pasi kreu 17 vite burg.
Po atë vit, ish-gjyqtarja liroi nga burgu edhe Ilir Pajën, i cili ishte i njohuar me nofkën “UFO” nga drejtësia italiane, duke qenë se ishte arratisur tri herë.
Gjyqtarja i lironte të dënuarit duke përfituar ryshfete të majme. Në skemë ishin të përfshirë edhe psikologë, sociologë e drejtorë të burgjeve që firmosnin dokumentet për të shpallur të parrezikshëm personat e burgosur.
