SPAK ka dhënë pretencën për dosjen e dytë ndaj ish-kryebashkiakut të Himarës, Jorgo Goro, lidhur me tjetërsimin e një prone në zonën e Livadhës. Prokuroria e Posaçme ka kërkuar dënimin me 2 vite burg për Goron, që me gjykim të shkurtuar konvertohet në 1 vit e 4 muaj heqje lirie. Akuza ndaj tij është “shpërdorim detyre”, kryer më shumë se një herë në këtë rast.
Për të njëjtën çështje, SPAK ka kërkuar edhe dënimin e ish-drejtorit të Menaxhimit të Pronës në Bashkinë e Himarës, Vasillaq Strakosha, me 1 vit e 6 muaj burg, që me gjykim të shkurtuar reduktohet në 1 vit.
Sipas dosjes hetimore, Goro akuzohet se në vitin 2016 ka dhuruar 4.263 metra katrorë tokë në zonën e Livadhës pasuesit të tij të komanduar në krye të bashkisë, Arqile Bollano. Kallëzimi për këtë çështje është bërë nga Fredi Beleri.
Ndërkohë, Goro është dënuar më herët me 2 vite e 20 ditë burg në një tjetër dosje, gjithashtu për shpërdorim detyre, në lidhje me kalimin e një sipërfaqeje toke për investime strategjike.
Ai u arrestua në mars të vitit të kaluar për një tjetër rast të tjetërsimit të pronave, këtë herë në fshatin Gjilekë të Dhërmiut, ku sipas SPAK, përfituesi përfundimtar i rreth 10 mijë metrave katrorë tokë ishte ish-deputeti Artan Gaçi. Kjo sipërfaqe është vendosur nën sekuestro nga Gjykata e Posaçme.
Në këtë çështje janë nën hetim edhe ish-kreu i Kadastrës së Vlorës, Bilbil Aliaj, që ndodhet në masën “detyrim paraqitje”, dhe ish-juristi Vezir Gjikoka, që ndodhet në “arrest shtëpie”.
