Një tjetër rast i trafikimit të mbetjeve toksike është zbuluar në Portin e Durrësit, pasi mediat italiane raportuan sekuestrimin e 58 tonëve mbetje toksike, me origjinë nga Shqipëria.
Mbetjet ishin fshehur pas etiketave false, dhe kërkohet fillimi i hetimeve nga Prokuroria e Durrësit për të zbardhur këtë fenomen.
Ky rast vjen vetëm pak muaj pas një tjetër skandali, kur në portin italian u sekuestruan 102 kontejnerë me mbetje të rrezikshme, gjithashtu të trafikuara nga Shqipëria.
Ky është një tregues i qartë se trafikimi i mbetjeve toksike është një ngjarje e përsëritur, e cila po ndodh nën hundën e autoriteteve shqiptare.
Ndërkohë, autoritetet italiane kanë intensifikuar kontrollet dhe kanë ndërmarrë operacionin “Metal Gate”, në kuadër të të cilit u sekuestruan mbi 58 tonë mbetje ekotoksike, që dy kompani me seli në Lombardi po përpiqeshin t’i importonin nga Shqipëria.
Verifikimet treguan se mbetjet përmbanin përqendrime të larta të zinkut, plumbit dhe bakrit, substanca me toksicitet të lartë për mjedisin. Për këtë çështje, u denoncuan përfaqësuesit ligjorë të kompanive italiane të përfshira në këtë trafik.
Ndërhyrjet e vazhdueshme të Guardia di Finanza dhe Agjencisë së Doganave italiane tregojnë angazhimin për të luftuar këtë fenomen, ndërsa në Shqipëri, sipas opozitës, institucionet vijojnë të heshtin dhe nuk kanë marrë asnjë masë konkrete.
