Komuniteti arbëresh i Leçes ka sjellë në Vlorë shfaqjen teatrale në kuadër të projektit “Gluha te rrënjëve”, një nismë që synon të ruajë gjuhën arbëreshe nga zhdukja. Trupa e aktorëve arbëreshë po shfaq në teatrin “Petro Marko” veprën “Vëj Kurorë”.
Famullitari i Kishës Shqiptare të Leçes, Nik Pace, tregon se kisha ku ai shërben u ndërtua nga arbëreshët para pesë shekujsh, ndërsa sot shërben si qendër shpirtërore për emigrantët shqiptarë.
Ai shpreh shqetësimin e madh se gjuha shqipe e folur në fshatrat arbëreshe nuk ekziston më, duke mbijetuar vetëm përmes këngëve tradicionale dhe shërbesave kishtare.
Pasardhësit e shqiptarëve që u vendosën në Itali rreth vitit 1530, theksojnë nevojën për një bashkëpunim më të ngushtë me shtetin shqiptar për të parandaluar humbjen e plotë të trashëgimisë së tyre gjuhësore.
“Një pjesë e zemrës është këtej”- shprehet një nga përfaqësuesit e komunitetit arbëresh të Leçes.
