Emisioni “Fiks Fare” denoncoi mbrëmjen e së hënës një skandal në Doganën e Portit të Vlorës, ku përgjegjësi Renato Bega ka vepruar në sistem edhe kur ishte jashtë territorit të Shqipërisë.
Pavarësisht se Bega ka qenë jashtë vendit, ai ka figuruar në dokumente duke autorizuar nxjerrjen e mallrave nga porti, duke krijuar mbi 2 mijë praktika doganore të dyshuara.
Sipas informacionit të siguruar nga “Fiks Fare”, Renato Bega ka kryer dhjetëra udhëtime jashtë shtetit, ndërkohë që figuron si përgjegjës për çlirimin e mallrave.
Ky veprim ka tërhequr vëmendjen e Drejtorisë së Përgjithshme të Doganave, e cila ka nisur procedura disiplinore ndaj Kryetarit të Degës së Vlorës, Artan Bedini, dhe ka pezulluar Renato Begën nga shërbimi civil.
Po ashtu, është nisur një hetim administrativ për të trajtuar problematikën e ngritur nga emisioni investigativ.
“Në përgjigje të kërkesës tuaj të datës 03.03.2025 me lëndë “Kërkesë për informacion” si dhe pas transmetimit të emisionit të mbrëmjes në Fiks Fare të po kësaj date, mbi Degën e Doganës Vlorë, Ju informojmë:
Pas transmetimit në emisionin tuaj investigativ të mbrëmjes të datës 03.03.2025, menjëherë brenda ditës së sotme 04.03.2025 u morën masat administrave:
Fillimin e ecurisë disiplinore për Z. Artan Bedini, Kryetar i Degës Doganës Vlorë
Pezullimin nga sherbimi civil të Z. Renato Bega, Përgjegjës turni në Degën e Doganës Vlorë
Nisjen e hetimit administrativ mbi problematikën e trajtuar nga emisioni “Fiks Fare” për Degën e Doganës Vlorë
Drejtoria e Përgjithshme e Doganave vlerëson maksimalisht komunikimin me mediat e shkruara dhe elektronike.
Duke Ju falenderuar per bashkepunimin
Kordinatori per te Drejten e Informimit – DPD”, njofton Drejtoria e Përgjithshme e Doganave
