Në një kohë kur vendet e BE-së po përballen me një valë të re të rritur të infektimeve me koronavirus, Rusia duket se është në rrugë të “mbarë” në prodhimin e vaksinave për këtë sëmundje.
Presidenti rus, Vladimir Putin, ka njoftuar se qendra shkencore ruse “Vektor”, ka regjistruar vaksinën e saj të dytë kundër koronavirusit.
“Qendra ‘Vektor ‘ e Novosibirskut regjistroi sot vaksinën e dytë ruse, kundër virusit korona e quajtur ‘EpiVakKorona’”,- deklaroi presidenti Putin, në një takim me anëtarët e qeverisë së tij.
“Me sa di unë, vaksina e tretë është në rrugë e sipër, qendra ‘Chumakov’ e Akademisë Ruse të Shkencave e ka gati edhe atë”,- shtoi ai.
Presidenti rus, Vladimir Putin, tha në fillim të këtij muaji se një vaksinë kundër virusit do të dalë në mes të tetorit.
Më 30 shtator, Instituti Federal për Pronësi Industriale të Rusisë, miratoi një patentë për vaksinën e koronavirusit në Qendrën Shtetërore Shkencore të Virologjisë dhe Bioteknologjisë “Vektor”.
Kujtojmë se në gusht të këtij viti, Rusia regjistroi zyrtarisht vaksinën e parë kundër koronavirusit, të krijuar nga Instituti “Gamaleya” me seli në Moskë.
Në atë kohë presidenti Vladimir Putin deklaroi në televizionin shtetëror rus se, “vaksina i kishte kaluar të gjitha kontrollet e nevojshme dhe se njëra prej vajzave të tij e kishte bërë atë, ku fillimisht kishte pasur pak temperaturë, por tani ndihej më mirë”.
/GazetaReforma.com/
