Partia Demokratike ka dorëzuar ditën e sotme në KQZ dosjen ankimore për zgjedhjet e 25 prillit. Në një deklaratë për mediat, përfaqësuesja e grupit të juristëve të Partisë Demokratike, tha se bëhet fjalë për prova që tregojnë qartë për atë çka e cilësojnë masakër elektorale.
Përfaqësuesja është shprehur se PD-ja e ka për detyrë që të luftojë për rikthimin e demokracisë në vend. Ajo ka thënë se ata e kanë për detyrë që të shpalosin të vërtetën, për të gjithë qytetarët shqiptarë me të gjitha mënyrat e mundshme.
“Procesi i 25 prillit ishte masakër elektorale e kryer nga Rama, Doshi dhe Rakipi. Viktima ishin shqiptarët.
PD e ka për detyrë që të luftojë për rikthimin e demokracisë. Depozituam qindra prova dhe fakte që provojnë tjetërsimin e vullnetit të qytetarëve shqiptarë, deri tek përdorimi i të dhënave nga sistemi i patronazhistëve të partisë-shtet. Është blerë vota në mënyrë të paligjshme, janë përdorur bandat për blerje vote, ka pasur mosveprim nga Policia dhe Prokuroria. Regjimi Rama – Doshi – Rakipi sundon gjithë sistemin shtetëror. Është detyra jonë që të shpalosim të vërtetën, për të gjithë qytetarët shqiptarë, me të gjitha mënyrat që ekzistojnë. Kjo është betejë për fëmijët dhe të ardhmen tonë. Të rrëzohet ky sistem”, deklaruan përfaqësuesit e PD-së.
