Presidenti francez Emmanuel Macron ka pranuar dorëheqjen e drejtoreshës së Muzeut të Luvrit, Laurence des Cars, pas një periudhe të mbushur me polemika që kulmuan me grabitjen spektakolare të bizhuterive të paçmuara në tetor të vitit të kaluar dhe me dyshime për mashtrim me biletat që dyshohet se ka zgjatur për një dekadë.
Des Cars ishte përballur me kritika të ashpra që prej 19 tetorit, kur një grup hajdutësh realizuan një grabitje të bujshme gjatë ditës në muzeun më të vizituar në botë. Luvri, që pret deri në 9 milionë vizitorë në vit, u trondit nga vjedhja e xhevahireve të kurorës franceze me vlerë 88 milionë euro, rreth 102 milionë dollarë.
Sipas autoriteteve, hajdutët hynë me forcë nga një dritare, të pajisur me mjete elektrike, përfshirë një prerës disku. Jashtë godinës priste një vinç i montuar në një kamion, i cili u përdor për të ndihmuar në bastisje. Ngjarja ndodhi rreth orës 9:30 të mëngjesit, ndërsa muzeu ishte i hapur për vizitorët. Disa persona janë arrestuar gjatë hetimeve, por bizhuteritë, që dikur janë mbajtur nga mbretëresha dhe perandoresha franceze, ende nuk janë rikuperuar.
Në një deklaratë, zyra e Macron e cilësoi dorëheqjen si një “akt përgjegjësie në një kohë kur muzeu më i madh në botë ka nevojë për qetësi dhe një shtysë të re të fortë për të kryer projekte të mëdha që përfshijnë përmirësime të sigurisë, modernizim” dhe nisma të tjera. Des Cars ishte emëruar në krye të Luvrit në vitin 2021, në një nga postet më prestigjioze në botën e muzeve.
Institucioni ka qenë gjithashtu në qendër të titujve të tjerë negativë, përfshirë dyshime për mashtrim në shkallë të gjerë me biletat, që thuhet se ka vijuar për 10 vjet. Po ashtu, muzeu ka përjetuar disa përmbytje që, sipas raportimeve, kanë dëmtuar një pikturë në tavan dhe libra, ndërsa janë shfaqur edhe probleme me punonjësit.
Qeveria franceze njoftoi se historiani i artit Christophe Leribault, aktualisht në krye të Pallatit të Versajës pranë Parisit, do të marrë drejtimin e Luvrit.
Grabitja nxori në pah boshllëqe serioze në sistemin e sigurisë së muzeut. Luvri, një ish pallat mbretëror i hapur për publikun gjatë Revolucionit Francez dhe shtëpia e veprës së famshme Mona Lisa, konsiderohet një simbol i historisë dhe identitetit francez. Arkitekti kryesor i monumenteve historike të Francës deklaroi për Associated Press vitin e kaluar se shumë muze në Evropë ndodhen në ndërtesa historike që nuk janë ndërtuar fillimisht për të garantuar sigurinë e veprave të artit.
Vetë Des Cars kishte pranuar se muzeu kishte mungesë kamerash sigurie jashtë godinës dhe dobësi të tjera që dolën në dritë pas grabitjes. Ajo kishte ofruar dorëheqjen që në ditën e ngjarjes, por Ministrja e Kulturës, Rachida Dati, e kishte refuzuar atë në atë kohë.
