Mbyllja e bizneseve për shkak të COVID-19 ka rënduar së tepërmi ekonomitë e familjeve shqiptare, një pjesë e të cilave nuk kanë përfituar ende asnjë ndihmë nga shteti.
Të gjendur në këtë situate 50 punonjës të një fasonerie në Korçë janë ngritur në protestë.
Ata shprehen se firma ku punojnë është mbyllur më 10 mars dhe nuk kanë para për të ngrënë bukë.
Njëra prej punonjësve shprehet se nuk ka asnjë të ardhur tjetër.
“Kemi dalë të protestojmë se thonë nuk na takon paga e luftës. Ne na takon se kemi paguar dhe sigurimet dhe tatimet, çfarë ka dashur pronari kemi bërë … kemi punuar … ama tani kërkojmë edhe ne të drejtat tona. Firma është mbyllur që nga data 10 mars, ne jemi me sigurime. Jemi 50 veta, ndërsa unë i kam të vetmet të ardhura. Punoj vetëm, jetoj vetëm, se prindërit më kanë vdekur. Ushqim s’kam, puna na është ndërprerë, për të na paguar asgjë. Si mund të përballohet? Tjetra ka fëmijën e sëmurë. Presim se çfarë mund të na thonë…”, është shprehur një punonjëse për Report Tv.
Një punëtore tjetër ndërkohë është treguar edhe më e ashpër, teksa ka kërcënuar se do ta djegë të gjallë pronarin nëse nuk e paguan.
“Dua të ha unë, jam burrë e grua në atë punë. Duan të na hedhin në rrugë dhe shikoni në çfarë ndërmarrje kemi punuar ne, na është rrezikuar jeta. Jam punëtorja më e vjetër, kam 22 vjet punë. Kemi dërguar dy përgjegjësit atje dhe një djalë tjetër. Kemi 22 vjet sigurime. Mos të ma takojë mua një 400 mijë lekëshe të ha bukë?! Unë skam asnjë fëmijë asnjë gjë… Jam atje me burrë e grua. Jam borxhë deri në grykë. Afendikoi (pronari) më hodhi në rrugë, deri dje shtynte karrocën me burrin tim. Sa e vështirë është për mua?! Ja unë s’kam bukë të haj. Jo kamera, se unë dhe një vit punë kam, por afendikoi (pronari) me gjithë afendikeshën (pronaren), jo në vrimë miu të futen, por do ta djeg të gjallë. Në vrimë miu të futet, me këdo që ka mbrapa, se jam pa bukë”, tha ajo.
Gjatë ditëve të fundit ka pasur protesta në të gjithë vendin, ku tregtarët e Beratit, Durrësit dhe Vlorës kërkojnë pagën e luftës siç e quan kryeministri.
