Policia e Shtetit në bashkëpunim me IKMT ka vijuar goditjen e rasteve të ndërtimeve pa leje në zonën lindore të periferisë së Tiranës, e cila kohët e fundit ka shtuar numrin e ndërtimeve të banesave luksoze. Ministri i Brendshëm Taulant Balla, shprehet se aksionit kundër paligjshmërisë nuk do t’i shpëtojë askush. Ai ka publikuar edhe një videoje të shpërndarë në rrjetet sociale ku duket aksioni i policisë dhe IKMT.
“Kush nuk ka vënë mend nga kjo histori, duhet të kuptojë se nuk ka tolerancë për askënd dhe ne do të rrisim vigjilencën e Policisë së Shtetit dhe agjencive të tjera ligjzbatuese për identifikimin, penalizimin, shembjen apo konfiskimin për interes publik të të gjitha sipërfaqeve në pallate, qendra biznesi, hotele të ndërtuara në shkelje të ligjit”, nënvizon Balla.
Ministri shton se të gjitha katet e konfiskuara do të shkojnë për strehim social apo për mjedise pune për institucionet publike.
