Naftëtarët e Ballshit hyjnë sot në ditën e 10-të të grevës së tyre të urisë. Prej ditësh gjendja e tyre është e rënduar, pasi nuk ushqehen, por së fundmi është përkeqësuar ndjeshëm.
Grevistëve u kërkohet që të marrin ndihmë mjekësore, me serume apo për trajtimin e tensionit të lartë. Spitali i Ballshit ka marrë urdhër që t’i trajtojë në ambientet e spitalit, por kjo është diçka që refuzohet nga ana e naftëtarëve. Ata refuzojnë të lënë ambientin ku po mbajnë grevën.
Ndërkohë, të gatshëm janë shumë naftëtarë të tjerë, që kanë shprehur devotshmërinë dhe sakrificën për t’i zëvendësuar naftëtarët për çdo situatë.
Naftëtarët protestojnë prej muajsh për pagat e padhëna për to, si dhe për mbylljen e rafinerisë, që i ka lënë ata pa asnjë të ardhur, teksa thonë se janë të zhytur në borxhe.
/GazetaReforma.com/
