Rritet borxhi i qeverisë ndaj bizneseve, si pasojë e pagesave të prapambetura të TV SH-së Tatimet, ndërkaq janë shtur edhe refuzimet e kërkesave të kompanive. Detyrimet më të mëdha në rimbursimin e TVSH-së u krijuan ndaj gazsjellësit TAP dhe investimet në HEC-et mbi lumin Devoll.
Stoku i TVSH-së së parimbursuar arriti rreth 92 milionë euro në tremujorin e tretë të këtij viti, me një rënie me rreth 4 për qind në raport me tremujorin e dytë të vitit, sipas të dhënave zyrtare nga Tatimet.
Gjatë tremujorit të tretë të vitit 2020, janë rimbursuar gjithsej 4,63 miliard lekë. Gjatë këtij tremujori, rreth 2,51 miliard lekë e vlerës së rimbursuar shkoi për pagesën e kësteve për tatimpaguesit e mëdhenj në listën e tatimpaguesve me këste. Ndërsa numri i kërkesave të miratuara dhe rimbursuara gjatë kësaj periudhe ka qenë në total 268 me vlerë rreth 2,11 miliard lekë.
Pranë Drejtorisë së Rimbursimit të TVSH-së, gjatë tremujorit të tretë, janë regjistruar 371 kërkesa për rimbursim me vlerë rreth 5,48 miliard lekë, nga të cilat janë pranuar 280 kërkesa me vlerë rreth 4,30 miliard lekë dhe 91 kërkesa me vlerë rreth 1,18 miliard lekë nuk janë pranuar për mosplotësim të kritereve ligjore.
Kërkesat e miratuara për dy tatimpaguesit më të mëdhenj ( TAP dhe Ayen Energy) të cilat trajtohen me këste përbëjnë 88.7 % të totalit të stokut të rimbursimeve në fund të tremujorit të tretë të 2020.
TVSH e parimbursuar përbën 17 për qind të detyrimeve të prapambetura të qeverisë së përgjithshme jashtë treguesve fiskale.
Që nga viti 2016, sipas ligjit, të gjitha sipërmarrjet që kanë një qarkullim në eksport 50% përfitojnë rimbursim automatik të TVSH -së brenda 30 ditëve. Kjo duket akoma e parealizueshme.
/Gazeta Reforma/
