Ministrat e Jashtëm të vendeve të BE-së nuk kanë rënë dakord për caktimin e një date për mbajtjen e Konferencës së Parë Ndërqeveritare për Shqipërinë dhe Maqedoninë e Veriut. Lajmin e bëri të ditur në një konferencë për mediat, ministrja e Punëve të Jashtme të Portugalisë dhe njëherësh zv/presidentja e BE-së për Transparencën Ana Paula Zacarias.
Kujtojmë se sot në Luksemburg u mblodh Këshilli i Çështjeve të Përgjithshme të Bashkimit Evropian dhe pritej që të caktohej një datë për mbajtjen e konferencës së parë ndërqeveritare mes Shqipërisë e Maqedonisë së Veriut me Bashkimin Evropian.
Në vitin 2019, dhjetë vende anëtare konsideronin se Shqipëria nuk përmbushte kushtet për hapjen e negociatave të anëtarësimit dhe ishin për ndarjen e Maqedonisë së Veriut nga Shqipëria, gjë që u kundërshtua edhe publikisht nga presidenti francez, Emanuel Macron dhe jo vetëm.
Dhjetë vendet anëtare i kanë konfirmuar ABC-së se tashmë janë shuar të gjithë dilemat dhe është arritur dakordësia për hapjen e negociatave mes Shqipërisë dhe BE-së. Po ashtu, bëhet e ditur se shumica dërrmuese e vendeve anëtare, nuk e duan që Konferencën e pare Ndërkombëtare ta zhvillojnë vetëm me Shqipërinë, pasi ne kemi qenë vetëm në momentin e fundit gati për këtë hap, ndaj është e padrejtë që Maqedonia e Veriut të mbetej pas.
