Tragjedia e rëndë në aksin nacional Sarandë–Delvinë, në vendin e njohur si “Pularia”, ka marrë përmasa të tmerrshme. Mbrëmjen e 24 gushtit 2025, dy motrat Elvisa dhe Rozina Dhimaku, përkatësisht 22 dhe 20 vjeçe, humbën jetën pasi automjeti i tyre tip “Lancia” u përplas kokë më kokë me një “Audi” që drejtohej nga 23-vjeçari Kevi Norra.
Hetimet zbuluan se i riu, banues në Fier dhe punonjës në Ministrinë e Brendshme, drejtonte makinën me shpejtësi të lartë dhe në gjendje të rëndë të dehur. Testet e alkoolit treguan se ai kishte konsumuar disa fish mbi normën e lejuar: në testin e parë rezultoi me 1.52 mg/l, ndërsa në testin e dytë me 1.42 mg/l, nivele shumë herë më të larta nga kufiri ligjor prej 0.1 gram/litër.
Norra dyshohet se kreu një parakalim të gabuar dhe hyri në korsinë e kundërt, duke i marrë jetën në vend motrave Dhimaku. Mikja e tyre, Antonela Zhupa, 24 vjeçe, e cila udhëtonte si pasagjere, mbeti e plagosur rëndë dhe pas ndihmës së parë në spitalin e Sarandës, u transportua drejt Spitalit të Traumës në Tiranë. Ajo ka politrauma, por ndodhet jashtë rrezikut për jetën.
Përplasja ishte aq e fortë sa automjetet u shkatërruan plotësisht, ndërsa njëri prej tyre mbeti i përmbysur në rrugë. Pamjet nga vendngjarja treguan skenën tragjike të shkatërrimit dhe dhimbjes së pamatë.
Motrat Dhimaku, banuese në fshatin Kopaçez të Delvinës, ishin vajzat më të mëdha të familjes. Elvisa, 22 vjeçe, drejtonte automjetin tip “Lancia”, ndërsa Rozina, 20 vjeçe, e ulur në sediljen e parë, ishte studente për Mjekësi. Ato humbën jetën në vendngjarje, duke i shkaktuar familjes një dhimbje të pamatë. Humbja e dy vajzave ka lënë pas një plagë të pashërueshme, por edhe një dramë të trishtë: në shtëpi i pret vëllai i tyre vetëm 10 vjeç, i cili vuan nga leuçemia.
Mikja e dy motrave, Antonela Zhupa, 24 vjeçe, mbeti e plagosur rëndë me politrauma dhe u transportua nga Saranda drejt Spitalit të Traumës në Tiranë, ku ndodhet jashtë rrezikut për jetën.
Kevi Norra u arrestua në flagrancë dhe ndaj tij rëndojnë akuzat për “Shkelje të rregullave të qarkullimit rrugor” dhe “Drejtim të automjetit në mënyrë të parregullt”. Autoritetet po vijojnë hetimet për të zbardhur të gjitha rrethanat e ngjarjes.
Komuniteti lokal është tronditur thellë nga kjo tragjedi që ka marrë jetët e dy motrave të reja, duke lënë pas vetëm dhimbje dhe lot.
