Ndryshe nga vendet e tjera të Ballkanit Perëndimor, ku papunësia godet më fort individët me arsim të ulët, Shqipëria përbën një rast të veçantë. Një raport i përbashkët i Bankës Botërore dhe Institutit të Vjenës për tregun e punës në rajon tregon se në vendin tonë normat më të larta të papunësisë regjistrohen tek ata që kanë përfunduar arsimin e mesëm.
“Kur analizohen normat e papunësisë sipas nivelit arsimor, bëhet e qartë se individët me nivele më të ulëta arsimimi vazhdojnë të përballen me norma më të larta papunësie në të gjithë Ballkanin Perëndimor. Megjithatë, Shqipëria spikat si një përjashtim, pasi normat më të larta të papunësisë janë vërejtur te individët me arsim të mesëm” thuhet në dokument.
Raporti vëren se prirja e përgjithshme mbetet e njëjtë si në rajon, ashtu edhe në Bashkimin Europian: arsimi i lartë shoqërohet zakonisht me norma më të ulëta papunësie. Megjithatë, shifrat ndryshojnë nga një vend në tjetrin. Diferenca e papunësisë mes BE-së dhe Ballkanit Perëndimor është e vogël për individët me arsim të ulët, vetëm 2.5 pikë përqindje. Kjo diferencë rritet në 6.1 pikë përqindje për ata me arsim të mesëm dhe në 4.2 pikë përqindje për ata me arsim të lartë.
Sipas të dhënave, gjatë vitit 2023 të tre grupet arsimore panë ulje të papunësisë, ku rënia më e madhe ndodhi tek individët me arsim të mesëm, me 1 pikë përqindje më pak. Por tendencat ndryshojnë sipas vendeve: në Bosnje dhe Maqedoninë e Veriut përmirësimi më i madh u pa tek individët me arsim të ulët, në Serbi dhe Kosovë tek ata me arsim të mesëm, ndërsa në Shqipëri dhe Mal të Zi ulja më e ndjeshme u regjistrua tek individët me arsim të lartë.
Raporti nënvizon se ndryshimet e dukshme nga vendi në vend e bëjnë të vështirë nxjerrjen e përgjithësimeve për rajonin, megjithëse në BE në tërësi rënia më e madhe e papunësisë gjatë vitit të kaluar u regjistrua tek individët me arsim të ulët.
