Më shumë se 200 tregtarë që ushtrojnë aktivitetin në tregun e Zdrales në Shkodër prej mbi tre dekadash, kanë protestuar sot para Bashkisë, pas një njoftimi zyrtar nga Komuniteti Mysliman i Shqipërisë që u kërkon lirimin e hapësirës brenda dy muajve.
Në vend të tregut parashikohet ndërtimi i një kompleksi pallatesh nga biznesmeni Alban Xhaferri, i cili është edhe president i klubit Vllaznia.
Projekti është miratuar nga Këshilli Kombëtar i Territorit, ndërkohë që Bashkia Shkodër nuk ka pasur rol vendimmarrës në dhënien e lejes.
“Po na nxjerrin në rrugë. Komuniteti Mysliman duhet të jetë shembull i solidaritetit, jo të na heqë kafshatën e bukës”, tha një nga protestuesit.
Tregtarët janë të shqetësuar se do të mbeten pa punë dhe pa mundësi për të siguruar jetesën. Ata theksojnë se nuk kanë mundësi ekonomike për të blerë dyqane në kompleksin e ri që parashikon hapësira tregtare me çmim deri në 5 mijë euro për metër katror.
“Ne nuk jemi trafikantë, por njerëz që shesim rroba për të mbijetuar. Çmimet e reja janë të paarritshme për ne. Duam të vijojmë punën aty ku kemi qenë gjithë jetën”, tha një protestuese.
“Na dhanë një muaj më shumë kohë, por asnjë zgjidhje reale. Ne nuk do të tërhiqemi, do e çojmë këtë çështje deri tek Kryeministri”, tha një tjetër protestues.
Tregtarët u drejtuan drejt Myftinisë së Shkodrës, ku zhvilluan një takim me dyer të mbyllura. Sipas tyre, nuk u ofrua asnjë zgjidhje konkrete, përveç një shtyrjeje të mundshme të afatit të largimit për vetëm një muaj.
Tregtarët paralajmërojnë se do të vijojnë protestat derisa të gjendet një alternativë konkrete për strehimin e aktivitetit të tyre tregtar.
