Më në fund, pas disa ditësh me rend rritës numri i rasteve të reja me koronavirus ka rënë, madje me një diferencë të dukshme nga dje kur u regjistruan 37 raste të reja.
IKSHP njofton se gjatë 24 orëve të fundit janë regjistruar vetëm 6 raste të reja nga 191 testime të kryera ditën e sotme.
Rastet pozitive janë raste kontakti, dy në Prizren, dy në Mitrovicën e Veriut dhe dy në Pejë.
Sakaq, ditën e sotme është shënuar edhe një viktimë, pasi bëhet me dije se një 40 vjeçare nga Gjakova ka ndërruar jetë në spital.
Kështu, numri total i të prekurve ka shkuar në 604, kurse numri i viktimave në 18.
Nga ana tjetër, gjatë 24 orëve të fundit janë shëruar 5 pacientë dhe tashmë numri i përgjithshëm i tyre është 128.
Pavarësisht statistikave të sotme, situata në Kosovë duket e renduar, pasi javën që lamë pas bilanci është thelluar ndjeshëm.
Njoftimi i plotë i ISHPK
PESË TË SHËRUAR DHE GJASHTË RASTE ME COVID-19!
Sot më 21 prill 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 191 mostra të marra nga Klinika Infektive, gjurmimi i kontakteve të rasteve në terren si dhe nga karantina në Qendrën studentore.
Me SARS-CoV-2, janë diagnostikuar gjithsej gjashtë (6) raste.
Rastet pozitive janë raste kontakti, dy (2) raste me vendbanim në Prizren, dy (2) raste me vendbanim në Mitrovicën e Veriut dhe dy (2) raste nga komuna e Pejës (sipas vendbanimit: një (1) rast Pejë dhe një (1) rast Llugaxhi.
Më datë 21 prill 2020, nga Klinika Infektive është raportuar një (1) rast i vdekjes, e gjinisë femër me moshë 40 vjeç me vendbanim në Gjakovë dhe e konfirmuar me COVID-19 me datë 15.04.2020. Pacientja është hospitalizuar në Klinikën Infektive dhe trajtuar në Mjekimin Intenziv me Dg.COVID-19, Graviditas hbd 28.
Komuna e Zveçanit dhe Leposaviqit kanë raportuar nga një (1) rast të vdekjes.
Sot më 21 prill 2020, janë shëruar edhe pesë (5) pacientë, bazuar në rekomandimet e OBSH-së ku dy mostra rezultojnë negative me së paku një ditë distancë kohore. Numri i përgjithshëm i të shëruarve deri më sot është gjithsej njëqind e njëzet e tetë (128) raste.
Nga data 08 shkurt deri më 21 prill 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 5.200 mostra të dyshimta në virusin SARS-CoV-2 dhe prej tyre pozitive rezultojnë gjithsej gjashtëqind e katër (604) raste, ndërsa gjithsej tetëmbëdhjetë (18) raste kanë ndërruar jetë dhe të cilët kanë pasur sëmundje të tjera shoqëruese.
Në IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke i obliguar për vetëizolim dhe të kërkojnë ndihmë mjekësore nëse kanë simptome. Deri më sot janë kontaktuar dhe janë nën mbikëqyrje 6.514 kontakte të rasteve.
Në nivel global, nga data 31 dhjetor 2019 deri më 21 prill 2020 sipas Worldometers, janë raportuar gjithsej 2.536.654 raste të COVID-19 dhe 175.759 raste të vdekjes.
QËNDRONI NË SHTËPI, KJO UA SHPËTON JETËN!
MBANI DISTANCË FIZIKE PËR SË PAKU 2 METRA!
NA NDIHMONI PAK QË TË JU NDIHMOJMË SHUMË!
Ju faleminderit për mirëkuptim!
