23-vjeçari shqiptar Arjan Toçi u arrestua në Kroaci, ku ishte shpallur në kërkim ndërkombëtar.
Ai ishte objekt i një urdhër-arresti të lëshuar nga Gjykata e Hetimeve Paraprake e L’Aquilas në Itali, për akuzën e “Trafikimit të lëndëve narkotike” brenda një organizate kriminale.
Arrestimi u bë i mundur përmes një operacioni të koordinuar, që përfshiu shkëmbimin e informacionit dhe bashkëpunimin mes strukturave të FAST Albania, pjesë e Forcës së Posaçme Operacionale në Policinë e Shtetit, dhe autoriteteve ndërkombëtare.
Njoftimi:
Policia e Shtetit
Kontribut konkret i FAST Albania, nëpërmjet rrjetit ENFAST, për kapjen e shtetasve të shpallur në kërkim ndërkombëtar
Në kuadër të bashkëpunimit të ngushtë me rrjetin ENFAST dhe homologët e FAST Kroacisë dhe FAST Italisë, është bërë i mundur lokalizimi dhe arrestimi, në territorin e Kroacisë, i shtetasit shqiptar A. T., 23 vjeç, banues në Peshkopi, i shpallur në kërkim ndërkombëtar.
Ky shtetas ishte shpallur në kërkim ndërkombëtar në bazë të një urdhër-arresti të lëshuar nga Gjykata e Hetimeve Paraprake e L’Aquilas, Itali, për veprën penale “Trafikimi i lëndëve narkotike”, kryer në kuadër të një organizate kriminale, sipas parashikimeve të Kodit Penal italian.
Ky operacion i suksesshëm u realizua falë shkëmbimit në kohë reale të informacionit dhe bashkëpunimit operacional ndërmjet strukturave të FAST Albania, pranë Drejtorisë së Forcës së Posaçme Operacionale në Departamentin e Policisë Kriminale të Policisë së Shtetit, dhe partnerëve ndërkombëtarë.
Policia e Shtetit, nëpërmjet strukturave të saj të specializuara, mbetet e angazhuar maksimalisht në bashkëpunimin ndërkombëtar, për lokalizimin, kapjen dhe ekstradimin e shtetasve të shpallur në kërkim ndërkombëtar, me qëllim vënien e tyre përpara drejtësisë.
