Sipas Organizatës Botërore të Shëndetësisë, numri i rasteve të kancerit të gjirit dhe vdekjeve prej tij pritet të rritet ndjeshëm në dekadat e ardhshme, veçanërisht në Evropën Veriore.
Vetëm në vitin 2022, kjo sëmundje preku 2.3 milionë gra, duke shkaktuar 670,000 vdekje.
Projeksionet për vitin 2050 tregojnë një rritje me 38% të rasteve të reja, duke arritur në 3.2 milionë, ndërsa numri i vdekjeve pritet të rritet me 68%, duke kapur shifrën alarmante të 1.1 milionë.
Rritja më e madhe e vdekshmërisë pritet në vendet në zhvillim, ku mungesa e diagnostikimit dhe trajtimit të hershëm mbetet një sfidë madhore.
Në vendet e pasura, si Malta, Danimarka dhe Belgjika, programet e avancuara të parandalimit dhe trajtimit kanë ulur ndjeshëm normën e vdekjeve.
Megjithatë, vetëm shtatë shtete kanë arritur të përmbushin objektivat globale për reduktimin e vdekshmërisë. Nëse të gjitha vendet do të implementonin këto masa, numri i vdekjeve mund të ulej ndjeshëm deri në vitin 2050.
Rreziku i diagnostikimit mbetet më i lartë në Australi, Zelandën e Re dhe Evropën Veriore, ndërsa normat e vdekshmërisë janë më të larta në Melanezi, Polinezi dhe Afrikën Perëndimore, ku gratë shpesh diagnostikohen në faza të avancuara për shkak të mungesës së aksesit në kujdesin shëndetësor.
Në Afrikë, shumica e rasteve identifikohen para moshës 50 vjeç, një ndryshim i theksuar krahasuar me rajonet e tjera.
Ekspertët theksojnë nevojën për investime të mëdha në diagnostikimin dhe trajtimin e hershëm, duke theksuar se miliona jetë mund të shpëtohen përmes qasjes së përmirësuar në shërbime shëndetësore.
