Presidenti serb Aleksandër Vuçiç, i pranishëm në Samitin e Minishengenit Ballkanin, shoprehu ngushëllime për të gjithë të prekurit nga tërmeti i 26 nëntorit.
I tronditur nga ajo që pa në Durrës, ai tha se qeveria serbe do të marrë vendimin, për të ndihmuar me një vlerë parash Shqipërinë.
Më tej ai bëri me dije, se do të nënshkruajnë një marrëveshje, ku njësitë e emergjencës të bashkëpunojnë nëse njëri nga vendet goditet nga fatkeqësi të tilla.
Vuçiç foli edhe për lehtësitë në pikat doganore, që do të ndihmojnë ekonomitë e vendeve respektive.
Presidenti serb foli edhe për krijimin e një tregu unik, që do t’u krijojë më shumë mundësi investitorëve.
“Shpreh ngushëllimet e mia për të gjithë personat e familjeve që vdiqën në tërmetin e tmerrshëm që goditi Shqipërinë. Unë besoj se gjithë njerëzit në vendin tuaj e kuptuan simpatinë tonë, se ne bëmë gjithçka. Falënderoj Ramën që na çoi sot në Durrës, ku pamë ata fëmijë të mrekullueshëm që kishin humbur familjarët, dhe them që qeveria e Serbisë do të marrë një vendim të hënën për të ndihmuar me një vlerë parash Shqipërinë, por edhe me donatorët më të mëdhenj. Diskutimet që kemi zhvilluar ishin në funksion të intensifikimi të marrëveshjeve tona.Njësitë tona të emergjencës do të bashkëpunojnë më ngushtë në të ardhmen, në mënyrë që kur një tragjedi të godasë ndonjëherë njërin nga vendet tona, të njëjtat forca do të jenë në vendin përkatës në të njëjtën kohë. Pra, do të jenë në dispozicion të njëri-tjetrit. Më duket se kemi marrë vendime të rëndësishme, që kanë rëndësi për gjithë rajonin. Ne do vijojmë të ndërtojmë jo vetëm inspektimet tona, shërbime 24 orë në dogana, më shumë lehtësira në pikat kufitare. Kamionët të mos rrinë më shumë se 6 orë në kufi, pra të përpiqemi të zbatojmë marrëveshjen e operatorëve të autorizuar. Kjo do të ulë kostot operative dhe do përmirësojë standardet e njerëzve tanë. 320 mijë kamionë kalojnë në vit në pikat kufitare. Kjo tregon çfarë përfitimesh ka një gjë e tillë. Për ata që e quajnë minishengen, ne do të përpiqemi të krijojmë një treg të përbashkët pune, që nënkupton një nivel më të lartë tërheqjeje për investitorët e huaj. Do jetë e mundur që ata thjesht të aplikojnë dhe të marrin leje të përhershme pune në Shqipëri, Serbi, Mal të Zi e Maqedoni. Një propozim do të jetë përafrimi i shumë rregulloreve, në mënyrë që të bëjnë një treg unik. Kjo është shumë e rëndësishme për ne, që jemi vende të vogla”, tha Vuçiç.
