Kryeministri Edi Rama do të zhvillojë ditën e sotme një takim me kryetarët e Bashkive. Bëhet me dije se mbledhja do të zhvillohet rreth orës 12:00, në kryeministri. Nuk dihet ende se çfarë do të diskutohet në këtë takim
Mbledhja e fundit e Ramës me kryebashkiakët u zhvillua në korrik, kur përjashtoi nga PS Fatos Tushen, ish- kryebashkiakun e Lushnjes. Rama paralajmëroi qartë kryebashkiakët se PS nuk do të mbrojë asnjë prej tyre, në rast se do të shkelin ligjin, apo nëse do të përfshihen në ngjarje korruptive.
Fatos Tushe u arrestua me 6 korrik, me 10 ish-vartësit e tij, nga një operacion i ndërmarrë nga SPAK, për akuzën e shpërdorimit të detyrës. Bëhej fjalë për një tender me vlerë rreth 23 mln lekë për rehabilitimin e një kanali ujitës në fshatrat Bishqethëm dhe Bitaj. Ky tender është fituar nga kompania EuroAlb shpk, që kishte sjellë ofertën më të lartë, por më pas punimet, fitimet dhe punën e ka bërë një kompani tjetër, e biznesmenit Ibrahim Lami. Ky i fundit, nga sa specifikohet në dosje, ka lidhje të ngushtë shoqërore me Tushen, si edhe lidhje familjare me biznesmenin që ishte shpallur fitues i tenderit, Bujar Muratin Në fund, Lami dhe Murati i ndanin paratë bashkë.
Një ditë më parë, kreu i qeverisë shkundi policinë e shtetit, duke iu lënë një afat 100 ditor për reformimin e drejtorive rajonale dhe zbulimin e efektivëve që dekonspirojnë Policinë e Shtetit.
