Ditën e djeshme në Postribë të Shkodrës, 26 nxënës të shkollës së mesme “Adem Haxhija”, u paraqitën me simptoma helmimi në spital.
Mësohet se 7 prej tyre vijojnë ende të jenë të shtruar.
Në një deklaratë për shtyp, spitali sqaroi se 16 prej rasteve janë trajtuar në repartin e infektivit, ndërsa 10 të tjerët te pediatria.
Mjeku i Urgjencës, Astrit Lahi tha se gjendja e të helmuarve nuk është e rëndë, ndërsa mund të ketë ardhur si pasojë e pasigurisë në ushqime, por edhe mungesës së higjienës, shkruan “Panorama”.
Policia ka sqaruar, se pronarët e fast food-it pranë shkollës janë shoqëruar, ndërsa një sërë institucionesh, që kanë lidhje me sigurinë ushqimore, kanë nisur hetimet.
Nxënësit e shkollës tregojnë se kanë gjetur brenda bukës me qofte një copë qelqi.
“Shkova një ditë për të blerë bukë me qoftë dhe brenda më qëlloi një copë qelqi. Shkova për t’ia kthye,r por shitësi më tha se nuk është qelq. Dy shokë të mi që i njoh dhe i kam në shkollë janë helmuar dhe kanë shkuar në spital”, shprehet një nxënës i shkollës “Adem Haxhija” në Postribë.
Ndërkohë drejtoresha e shkollës, Edlira Alija, thotë se nuk ka dijeni për helmimin dhe fajin ia vë virozave të stinës.
“Ende nuk kam informacion se nxënësit janë helmuar. Kjo mund të jetë edhe si shkak i virozave të stinës. Ne kemi pasur disa nxënës që nuk kanë ardhur në shkollë këto ditë dhe kemi folur me prindërit dhe na kanë thënë se janë të prekur nga virozat e stinës. Shkolla ka 600 nxënës dhe situata në përgjithësi është nën kontroll dhe nuk ka vend për alarm”, deklaroi ajo.
