Notarja me origjinë shqiptare, Eva Buzo ia ka dalë që të mbërrijë me not nga Italia në Shqipëri. Ky ishte viti i dytë radhazi që Buzo e provonte këtë sfidë, dhe këtë herë me sukses, edhe pse gjendja e saj fizike ka qenë dukshëm e sfilitur.
Udhëtimi i saj nga zona e Lecces në Itali, drejt bregdetit të Vlorës, ka zgjatur për rreth 35 orë, ndërsa ka përshkruar një gjatësi prej 92 kilometrash në det të hapur.
Gjatë gjithë rrugëtimit të saj ajo u ndoq nga dy mjete lundruese gomone, të gatshme për të dhënë ndihmën e parë në rast nevoje.
Udhëtimi për Buzon, me profesion avokate, nuk ka qenë i lehtë fizikisht, për shkak të orëve të gjatë që ka qëndruar në ujë. Ajo ka ndaluar shumë pak duke pirë ujë dhe udhëtimi ka qenë konstant. Nuk ka pasur asnjë problem gjatë udhëtimit prej 34 orësh. Në momentin e mbërritjes Eva nuk është në gjendje të flasë për shkak të kalcifikimit të gojës nga kripa, por gjendja e saj shëndetësore është shumë e mirë.
Për Buzon nuk është hera e parë që e ndërmerr këtë sfidë. Në vitin 2023 ajo u nis për të notuar në kanalin e Otrantos për rreth 70 kilometra e për të mbërritur në bregun e Vlorës, por e ndërpreu pas 28 orësh vetëm pak milje nga Karaburuni pasi pickimi i një kandili ia rëndoi situatën. Për pasojë gjendja e saj u përkeqësua rrugës pas pickimit të kandilit të detit në pjesë të ndryshme të trupit dhe u detyra ta ndërpriste rrugën e saj.
